Sekretari i Përgjithshëm i Partisë së Lirisë, Tedi Blushi ka akuzuar qeverinë dhe institucionet shtetërore se kanë dështuar të ruajnë sigurinë kombëtare, pasi sipas tij “blogerët” kanë hyrë edhe në Pashaliman, të cilën kryeministri disa muaj më parë ia ofroi NATO-s për bazë të sigurt ushtarake. Blushi ka bërë publik një tjetër rast, ku të tjerë turistë të huaj kanë hyrë në bazën e Pashalimanit.
Postimi:
INSTITUCIONET KANË DËSHTUAR: “Blogerët” kanë hyrë në Pashaliman! Kryeministri ia ofroi NATO-s në maj 2022 për bazë të sigurtë! Vetëm dy muaj më parë “blogerë” të huaj, me shtetësi dhe kombësi të panjohur zyrtarisht, kanë hyrë në bazën ushtarake të Pashalimanit. Këto foto janë një tjetër dëshmi e kapitullimit të institucioneve! Janë fotot e turpit dhe të papërgjegjshmërisë ekstreme të Kryeministrit, Ministrit të Mbrojtjes, SHISH, Policisë së Shtetit, Antiterrorit dhe çdo strukture tjetër të ngarkuar me ligj për mbrojtjen e Sigurisë Kombëtare. Institucionet kanë dështuar për faqe të zezë sepse askush nuk i ka ndaluar, as i ka pyetur dhe as u ka kërkuar sqarime “blogerëve” të huaj që kanë bërë çfarë kanë dashur në Pashaliman, një nga bazat kryesore ushtarake detare të Shqipërisë, vend anëtar i NATO-s. Kur “blogerë” apo “turistë” janë të aftë të thyejnë në çdo kohë filtrat e sigurisë të bazave tona ushtarake, të filmojnë dhe të marrin prej andej çfarë të duan, imagjinoni ç’mund të bënin armiq të NATO-s, grupet terroriste apo aktorë të tjerë që duan të dëmtojnë Sigurinë tonë Kombëtare dhe të destabilizojnë rajonin. Skandali thellohet çdo ditë dhe vë përpara përgjegjësisë direkte vet Kryeministrin, që në maj të këtij viti ia ofroi NATO-s, Bazën Ushtarake të Pashalimanit, me garancinë e një baze detare të sigurt! Shpërdorimi i detyrës duhet t’i vendosë sa më parë para ligjit të gjithë përgjegjësit! Institucionet nuk kanë funksionuar! Qartësisht kanë dështuar!
Ky reagim vjen pas dy ngjarjeve që kanë ndodhur në Gramsh dhe në Poliçan. Turistë rusë, ukrainas dhe çekë, janë futur në ambientet e uzinave usharake. Në uzinën e Gramshit, tre turistët, tashmë të arrestuar, u përplasën me dy ushtarë të cilëve u hodhën spraj. Qeveria shqiptare akuzon dy rusët dhe ukrainasin si spiunë.
Discussion about this post