Policia e Tiranës arrestoi së fundmi një 21-vjeçar pasi u zbulua teksa kishte falsifikuar disa karta identiteti, përmes të cilave aplikonte për të marrë kredi përmes aplikacionit në institucione financiare.
Policia njoftoi se ishin dokumentuar të paktën 9 raste ku i riu kishte aplikuar dhe marrë kredi në vlerat 1 000-3 400 euro me karta identiteti të falsifikuara.
Raportohet se ai përdorte foton e tij si edhe të dhënat e personave të tjerë për të falsifikuar kartat e identitetit, të cilat më pas i përdorte për të aplikuar për kredi.
“Nga hetimet ka rezultuar se ky shtetas falsifikonte karta identiteti, duke përdorur foton e tij dhe të dhëna të shtetasve të tjerë, dhe me to aplikonte dhe përfitonte kredi me vlera nga 1000 euro deri në 3400 euro. Si rezultat i hetimeve janë dokumentuar 9 raste të përfitimit të kredive, nga ky shtetas, pas aplikimit me dokumente false”, tha policia.
Burime policore thane se disa prej kredive janë marrë te IUTE Credit, ndërkohë që verifikimet vijojnë pasi dyshohet se ai ka kryer edhe aplikime në institucione financiare të tjera duke shfrytëzuar të çarat në praktikat e identifikimit të aplikantit.
Kjo skemë e përdorur nga 21-vjeçari është e ngjashme me atë të Donika Currit që mashtroi 23 gra në Zejmen të Lezhës.
Ajo shfrytëzoi raportet me gratë duke iu prezantuar atyre si punonjëse në një organizatë bamirëse, dhe pasi u mori kartat dhe fotot e tyre, aplikoi për kredi në emrin e tyre përmes aplikacionit MyIUTE të IUTE Credit.
Aplikimi përmes aplikacionit sin ë rastet e mësipërme, lehtëson mashtrimet, por edhe ul aftësitë e kredidhënësit për të verifikuar identitetin si edhe aftësitë paguese të kredimarrësit.
BSH tha për Skyweb.al se identifikimi në distancë është i ligjshëm në Shqipëri, gjatë aplikimeve për kredi, “për aq kohë sa zbatohen detyrimet ligjore”.
Në të dyja rastet duket se diçka ka çaluar në sistemin e verifikimit të identitetit të aplikantit për kredi duke sjellë pasoja të rënda.
Discussion about this post