Skënderbeu-Partizani përballen në orën 16:30 në stadiumin e Korçës.
Pas fitores ndaj Erzenit, te “Ujqësit e Dëborës” është rikthyer qetësia dhe takimi ndaj kampionëve në fuqi pritet me shumë interes në qytetin juglindor.
Trajneri Ivan Gvozdenoviç nuk do të ketë në dispozicion njërin prej titullarëve më stabël në repartin e mbrojtjes, ganezin Randi Dumfur.
Ky i fundit ka plotësuar numrin katër të kartonëve të verdhë, duke u bërë lojtari i parë që merr kaq shumë ndëshkime te bardhekuqtë në këtë start sezoni. Pjesa tjetër e skuadrës është gati kundër Partizanit.
Formacioni i mundshëm te Skenderbeu:
3-5-2: Alia, Frashëri, Ramos, Preniçi, Vangjeli (Gerco), Liço, Rabi, Pecani, Shaqe, Nikaj, Rashica
Ndërkohë për ekipin e “Demave” pritet që katër titullarë të mos jenë të gatshëm në sfidën e sotme.
Qirko është kthyer të stërvitet normalisht, por ka ende pasiguri. Ndërkohë, Andi Hadroj vijon të ketë probleme muskulore dhe nuk do të jetë gati për Skënderbeun, por rrezikon edhe sfidën e radhës ndaj Teutës.
Valentino Murataj pësoi një tërheqje të gradës së parë në ndeshjen ndaj Dinamos dhe gjatë javës ai është stërvitur i veçuar dhe duket mjaft e vështirë që të jetë në fushë ndaj Skënderbeut.
Një tjetër lider i mesfushës, Arinaldo Rrapaj, nuk do të jetë i gatshëm. Vlonjati ndien dhimbje në pjesën e kofshës dhe nuk është në gjendje të luajë.
Këto mungesa të rëndësishme e vënë Zekiçin mjaft në vështirësi, por duhet thënë se alternativat nuk mungojnë, veçanërisht në mesfushë, aty ku “gropa” është më e madhe.
Sa i përket 11-shes, mbrojtja nuk ndryshon, ndërsa Mehmeti dhe Maget pritet të vendosen para difensivës, me senegalezin, që do të duhet të mendojë më së shumti për fazën defensive.
Para tyre pritet të luajë Taipi, teksa sulmi mendohet të jetë me tre. Da Silva në krah, ndërkaq me shumë mundësi rikthehen Mba dhe Da Silva si titullarë.
Formacioni i mundshëm te Partizani:
4-2-3-1: Hoxha; Zekolli, Bytyçi, Sota, Atanaskovski, Mehmeti, Maget, Taipi, Bintskuka, Mba, Da Silva
Discussion about this post