Një skenë filmash horror, kjo është ajo që të vjen në mendje teksa sheh pamjet brenda banesës së çiftit Rrasa në Divjakë, ku Hekurani, kryefamiljari, qëlloi disa herë me çifte gruan e tij dhe më pas edhe veten.
Në të gjithë shtëpinë, e rrënuar pothuajse, dhe me mungesë investimesh, ka gjurmë gjaku, ndërkohë që në mes qëndron një kovë me ujë që është po përdoret nga të afërmit për të pastruar skenën e krimit.
Mësohet se 58-vjeçari Rrasa e ka qëlluar bashkëshorten e tij në pjesën e mjekrës, duke i shkaktuar plagë të rënda në kokë, ndërkohë që më pas ka qëlluar edhe veten.
Sipas burimeve vrasja ka ndodhur në kushtet e depresionit, dhe Fëllënxa Rrasa kishte pasur dy vite më parë urdhër mbrojtjeje për dhunën e bashkëshortit të saj.
Krimi i rëndë ndodhi mbrëmjen e sotme në fshatin Babunjë të Divjakës. 58-vjeçari mësohet se punonte në Bashkinë e Divjakës. Çifti kishin probleme ekonomike dhe dyshohet se kjo gjë është bërë shkak për krimin e rëndë.
