Mbi 1600 shoferë janë gjobitur brenda një javë nga “Rrugorja” për shkelje të ndryshme të qarkullimit rrugor. Me makinën inteligjente dhe radarët automatikë, policia rrugore ka kapur në shkelje mijëra shoferë “rebelë’ në rrugët e Shqipërisë. Mësohet gjithashtu se policia ka pezulluar dhe 683 leje drejtimi për një javë.
“Flota e re e automjeteve të Policisë Rrugore, e pajisur me bazën logjistike bashkëkohore, makinën inteligjente dhe radarët automatikë, në monitorim të qarkullimit rrugor, me qëllim parandalimin e aksidenteve dhe rritjen e parametrave të sigurisë në rrugë.
Prej një jave, në të gjitha rrugët e vendit, këto mjete kanë skanuar shpejtësi deri në dyfish mbi normën e lejuar, në rrugët urbane dhe në ato nacionale. Shpejtësitë më të mëdha janë konstatuar gjatë orëve të mbrëmjeve dhe gjatë orëve të para të mëngjeseve. Gjatë një jave, janë pezulluar 683 leje drejtimi, për shpejtësi mbi normat e lejuara.
Janë vendosur 1610 masa administrative, po për shpejtësi mbi normat e lejuara, por pa sanksionin plotësues pezullim i lejes së drejtimit.
Gjithashtu, janë evidentuar dhe ndaluar 233 automjete të shpallura “Alert”, kryesisht për shpejtësi, të evidentuara nga makina inteligjente. Drejtuesve të këtyre mjeteve u është pezulluar leja e drejtimit, si dhe janë ndëshkuar me masat administrative përkatëse.
Janë evidentuar dhe ndëshkuar 22 drejtues mjetesh, për gara shpejtësie. Janë evidentuar dhe ndëshkuar 431 drejtues mjetesh, për parakalime të rrezikshme në rrugë.”-njofton policia.
Discussion about this post