Ambasadori i BE-së në Shqipëri Luigi Soreca është takuar ditën e sotme me kryetaren e Komisionit Parlamentar të Integrimit Jorida Tabaku, e cila ishte shoqëruar nga dy deputetët e PD Flutura Açka dhe Belind Këlliçi.
Me anë të një postimi në “Twitter”, Soreca ka ndarë një foto me Tabakun, teksa shkruan se integrimi i Shqipërisë në BE është një përparësi ndërpartiake, kombëtare mbi të cilën të gjitha forcat politike duhet të punojnë në interes të të gjithë qytetarëve shqiptarë.
“U takova sot me Jorida Tabakun, Kryetare e Komisionit Parlamentar për Integrimin Evropian. E përgëzova për emërimin dhe përshëndeta kthimin e opozitës në Parlament.
Integrimi i Shqipërisë në BE është një përparësi ndërpartiake, kombëtare mbi të cilën të gjitha forcat politike duhet të punojnë së bashku në interes të të gjithë qytetarëve shqiptarë. Integrimi në BE duhet të qëndrojë lart në axhendat e Qeverisë dhe Parlamentit.”, shkruan Soreca.
Ambasadori nënvizoi faktin se “Bashkimi Europian do të mbështesë punimet e komitetit, që luan një rol të rëndësishëm në monitorimin e punës së qeverisë për sa i përket integrimit”.
