Këshilli i Legjislacionit do të mblidhet ditën e sotme në orën 11:00 në kryesinë e Kuvendit të Shqipërisë për të diskutuar kërkesën e PD për shkarkimin nga pozicioni i Kryetares së Kuvendit të Lindita Nikollës.
Grupi i deputetëve të drejtuar nga Alibeajt ka kërkuar shkarkimin e Lindita Nikollës me argumentin se mbylli seancën plenare për të mbrojtur politikisht Ramën.
Në mbledhjen e shkuar u caktua që kërkesa për shkarkimin e Nikollës do të votohet me shumicë të thjeshtë në seancë plenare. Ndërkohë sot pritet që relatorët Gazment Bardhi nga krahu i PD dhe Etilda Gjonaj nga PS, të prezantojnë raportet që do t’i kalojnë Kuvendit për votim.
Lidhur me kërkesën për shkarkimin e Nikollës, të mërkurën Kreu i Grupit parlamentarë të PS, Taulant Balla tha se kjo kërkesë nuk qëndron dhe nuk do të pranohet.
“Këta mund të kërkojnë edhe shkarkimin e qeverisë, shpërndarjen e parlamentit. Kërkesa të pafundme. Por e para është që nuk gjej qoftë dhe një argument të vetëm që të kërkosh shkarkimin e kryetares së Kuvendit, në kushtet kur kryetarja në seancën e fundit plenare, ka zbatuar rregulloren e Kuvendit.
Asnjë lloj kërkese e kësaj forme nuk mund të miratohet dhe nuk mund të merret në konsideratë. “, tha Balla.
Discussion about this post