2021-shi po ikën si viti i dytë plotë dinamika dhe nën pushtetin e koronavirusit për shqiptarët dhe jo vetëm. Kanë mbetur dhe pak orë nga momentin kur 2022-shi do të trokasë në dyert tona për të lënë pas trazirat e këtij vitit dhe pse jo për të na dhënë shenja për një kohë më të mirë.
Në çdo vit, vende të ndryshme të botës kanë festuar në mënyra të ndryshme, por rutina e ndërrimit të viteve në thelb ka qenë e njëjtë, ndërsa këtë herë do të jetë vërtetë ndryshe për shumë vende për shkak të rasteve të shumta me Koronavirus.
Varianti më i ri i këtij armiku të padukshëm ka kapluar keq disa vende, të cilat janë detyruar që të rikthejnë karantinën, duke përmendur këtu Holandën. Ndërsa Greqia, Italia dhe disa vende të tjera kanë rritur orën policore dhe kanë anuluar koncertet për këtë natë, e gjitha për shkak të infektimeve në masë që ka sjellë kjo pandemi.
Ndërsa shqiptarët, ndryshe nga viti që shkoi, kur gjendja ishte më alarmante, këtë herë do të festojnë pa masa shtesë dhe pa orë policore. Prej muajsh në vendin tonë qytetarët nuk mund të dilnin nga shtëpia pas orës 23:00 deri në orën 6:00, ndërsa për natën e ndërrimit të viteve Ministria e Shëndetësisë vendosi të bëjë një përjashtim: nuk do të ketë orë policore, qytetarët mund të dalin edhe pasi ora të shënojë 00:00. Ky është një lajm i mirë për të rinjtë dhe të gjithë të tjerët që zakonisht ndërrimin e viteve e festojnë jashtë, shkojnë vizitojnë njeri-tjetrin, apo frekuentojnë club-et.
Por, Kujdes! Kjo vlen vetëm për këtë natë, pasi në datë 1 janar 2022 vendi do të zbatojë orën policore dhe protokollet në fuqi, duke shpresuar që pandemia nuk do agravojë dhe nuk do jetë nevoja për ashpërsim masash në vitin që po vjen.
Duke shpresuar se viti 2022 do të na largojë Covid-19 dhe do t’i rikthehemi normalitetit, Gijotina.com iu uron një mbrëmje të mrekullueshme dhe një vit sa më të mbarë!
Gëzuar Vitin e Ri!
Discussion about this post