Aktorë e aktivistë të cilët mbrojtën për një kohë të gjatë Teatrin Kombëtar, kanë mbajtur sot homaxhe, pasi ka kaluar një vit që nga shembja e godinës. Me lule në duar, ata kanë ndezur qirinj në vendin ku ishte godina e Teatrit Kombëtar.
“Teatri Kombëtar, krim shtetëror i pandëshkuar nga drejtësia e kapur,” thuhet në pankarta.
Në mëngjesin e 17 majit të vitit të kaluar u regjistrua një ditë e zezë për artin në Shqipëri. Ishte ora 04:30 e mëngjesit kur godina e Teatrit Kombëtar dhe Eksperimental u rrethua nga fadroma dhe Forcat Speciale Policore, duke arritur qëllimin: rrënimin e ndërtesës historike në qendër të Tiranës. Lajmi u prit me protesta në shesh, të shoqëruara nga dhunë policore dhe dhjetra të shoqëruar, ku nuk munguan qytetarët e thjeshtë dhe as përfaqësuesit e partive politike. Disa qytetarë që kundërshtuan u shoqëruan për në komisariatet e policisë. Pas shembjes së Teatrit, qytetarët u përplasën me policinë gjatë gjithë ditës.
