Kryetari i Bashkisë Korçë, Sotiraq Filo, sezonin veror po e shfrytëzon duke menduar për institucionet arsimore. Se mos ju shkon mendja tek ndonjë projekt zhvillues, se në të vërtet thelbi është si të marrë nga fondet e caktuara për këto institucione. Dhe Filo e ka gjetur zgjedhjen, po zhvillon tendera pa garë.
Së fundmi Bashkia Korçë ka zhvilluar prokurimin me objekt ‘Meremetimi i Institucioneve Arsimore’. Bëhet fjalë për ndërhyrje në 22 shkollat publike që përfshin kjo bashki në zonën e qytetit. Dhe sipas planit do të bëhen ndërhyrje kryesisht në pjesën e fasadës, pra risuvatime, lyerje muresh, sistemim oborresh.
Kjo ndreqje fasade do të kushtojë 240 milionë lekë. Më poshtë do të tregojmë se do shpenzohen 240 milionë lekë, por aspak siguri nuk ka që këto para do të investohen të gjitha tek shkollat.
Tenderi pa garë
Këtë hipotezë shumë qartë e vërteton kontrata e nënshkruar në shkelje që Filo ka firmosur me kompaninë Fusha Shpk, në pronësi të biznesmenit të njohur për korrupsion Shkëlqim Fusha.
Fillimisht kanë dorëzuar oferta 2 kompani, FUSHA dhe VALONA KONSTRUKSION, kjo e fundit kishte ofertën më të lirë por është përjashtuar se nuk ka përmbushur një kontratë tjetër që kishte me këtë bashki për ndërhyrje në çerdhe dhe kopshte.
Ky argument është i qëndrueshëm për të skualifikuar ofertën në fjalë, por nuk do të thotë që procedurat e tenderit të vazhdojnë me shkelje. Sipas ligjit duke qenë se mbeti vetëm një ofertë e vlefshme, procedura duhej anuluar, për mungesë konkurrence. Por me sa duket kjo situatë i interesonte Filos, i cili ka shkelur rregullat dhe kontratën ja dhuroi pa garë Fushës, sigurisht nga ky fond ai ka marrë përqindjen e vetë, pasi është ai që hedh firmën e vulosi aferën.
Open Data i ka vënë Flamur të Kuq, për shkeljet që janë bërë në këtë tender, duke vërtetuar që kemi të bëjmë me abuzim më shumë se sa me një plan të drejtë për investim.
Fusha njihet për shumë projekte abuzive që ka marrë nga Rilindja, ku përmendim më të fundit miliardat e marra tek Piramida, ndërtimi i Tetarit dhe tashmë ndërtimi i një kulle.
Me një vendim të datës 3 Maj të vitit të kaluar, Bashkia Tiranë i ka dhënë kompanisë “Fusha shpk” 1266.6 m2 truall në rrugën “Abdi Toptani”, dhe dy ndërtesa përkatësisht 801.4 m2 dhe 183 m2. Njëra prej tyre është godina e ndërmarrjes së dekorit të Tiranës.
Kompania “Fusha” ishte ofruar që në vitin 2018 për ndërtimin falas të Teatrit Kombëtar në këmbim të një sipërfaqeje prej mijëra metra katrorë ku do të ngrinte edhe një kompleks prej 6 kullash.
Aktualisht, Teatri me një kosto prej 40 mln euro po ndërtohet nga fondet publike, megjithatë sipërmarrësi po e realizon ambicien për të ndërtuar mbi tokë publike në zemër të kryeqytetit. “Në këmbim të përfitimit të 50 % të sipërfaqes ndërtimore (nëntokë dhe mbi tokë), që do të ngrihet në pasurinë e llojit truall në pronësi të Bashkisë së Tiranës”, thuhet në vendimin e Bashkisë Tiranë.
Pra Fusha duket se po merr në kontroll bashkitë në vend dhe po përlanë buxhetin e shtetit!
©️Copyright Gijotina.com Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post