Spahia, 86 mln lekë Nazërajt, rojës së parave që u vodhën në Rinas

Bardh Spahia, i vetmi kryebashkiak nga PD-ja e Berishës, nuk mbetet pas socialistëve për abuzime me fondet e bashkisë. Që kur mori postin si kryetar ai regjistron  me dhjetëra kontrata në shkelje të ligjit të prokurimeve. Edhe tenderi i radhës, i pari për vitin 2023, është skuqur me shkelje.

Bëhet fjalë për prokurimin me objekt “Shërbimi i sigurisë ne objekte”. Për këtë tender do të shpenzohen 86 milionë lekë. Fituesi është shpallur me datë 5 janar 2023, ndërsa Open Data Albania e ka klasifikuar në prokurimet me “Red Flag”, pasi kontrata është firmosur në mungesë të konkurrencës. Në dokumente thuhet se  vetëm firma “NAZERI – 2000”sh.p.k., në pronësi të Durim Nazërajt, ka paraqitur ofertë. Dhe Spahia, me nxitim e ka shpallur fituese kompaninë e policisë private, duke anashkakuar kështu rregullin për konkurrencën e lirë.

Ndërsa më tutje, evidentohet se oferta e paraqitur nga kjo kompani kap shifrën 8 661 600,00 lekë (të reja). Pra, vlera është sa 99% e fondit limit. Kjo lë dyshime se kemi të bëjmë me fitues të paracaktuar. Theksojmë se Durim Nazëraj është një nga të përkëdhelurit e kryebashkiakëve, duke përfituar tenderë me vlera të larta dhe shpesh herë në thyerje të rregullave të prokurimit.

Fama e kompanisë së Durim Nazërajt

Durim Nazëraj është përfshirë në disa skandale me kompaninë e tij “NAZERI – 2000”, por që nuk merren fare parasysh nga zyrtarët. Kujtojmë se në prill të vitit 2019 “NAZERI-2000” Ishte kompania private që transportonte miliona eurove që u grabitën në pistën e Rinasit. Por nuk mbaron me kaq! Në 3 grabitje të ndodhura në Rinas, në 2 prej tyre paratë po transportoheshin nga “Nazeri 2000”. Ndërsa në vitin 2016 pati edhe dyshime se rojet e sigurisë së kësaj kompanie kishin bashkëpunuar.

Asaj kohe përfaqësues të kompanisë “Nazeri 2000”, e cila kishte nën përgjegjësi sipas policisë, paratë që u vodhën në mënyrë spektakolare në pistën e avionit “Nënë Tereza” në Tiranë u shprehën për mediat se “Nuk kemi informacion të saktë, nëse paratë e vjedhura ishin nën kujdesin tonë”.

Kështu, ky skandal u harrua dhe qeveria asaj kohe nuk mori asnjë masë ndaj tyre. Për t’i mënjanuar nga tenderët publikë. Kështu sot, Nazëraj vazhdon të xhirojë miliona në tenderë abuzivë.

Lexo edhe: Spahia i jep 220 mln lekë Benard Martinit për fasadën e 1 shkolle

©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.