Kryebashkiaku i vetëm demokrat, Bardh Spahia, me sa duket i ka rregulluar marrëdhëniet me qeverinë dhe nuk i druhet fare SPAK-ut. Në këtë pak kohë që na ndan nga zgjedhjet e 14 Majit, Spahia i është futur me kokë tenderëve. Me të cilat mbush xhepat e miqve, por edhe rregullon fasadat që t’i ketë si imazh për në fushatë.
Në tenderin e fundit, Spahia është kujtuar që të kalojë një dorë nga lagjet e vogla të qytetit dhe të vendosë ndriçimin në rrugicat e tyre. Kontrata është firmosur me datë 17 mars 2023, dhe ka si objekt “Investime në ndriçim rrugë dytësore”. 63 milionë lekë do të shpenzojë Spahia për këtë tender.
Por, siç shihet në dokument, edhe kur bëhet fjalë për fond të vogël, Spahia i kalon në procedura abuzuese me risk të lartë korrupsioni. Këtë e tregon fakti se Spahia e ka dhënë tenderin pa garë.
Tenderi pa garë
Për këtë projekt kanë paraqitur ofertë 4 firma, por tre janë skualifikuar me argumentin se nuk kanë paraqitur punë të ngjashme me atë çka kërkon ky projekt. Se çfarë specializimi duhet për të vendosur drita në rrugicat e lagjeve këtë e di vetëm Spahia dhe stafi i tij, por fakti që ka lënë vetëm 1 firmë në garë përbën të konkurrencës.
Në dokument shihet qartë që, edhe pse bashkimi i operatorëve “BORIS 2019”sh.p.k & NDERTUESI 2014 ”sh.p.k” ka paraqitur ofertën më të lartë, sërish janë shpallur fitues, duke mos e kursyer fondin limit.
Sikur të mos mjaftojë kjo. Kontrata thotë se fituesit do t’i duhet 2 muaj afat që të vendos dritat në rrugica. Kjo do të thotë që punimet do të përfundojnë fiks në ditë e zgjedhjeve. Një tablo e qartë kjo që tregon lëvizjet e Bardh Spahisë për të bërë fushatë me paratë e taksapaguesve shkodranë.
Ky fakt nuk është më një çudi. Qysh në fillim të këtij viti, Spahia ka nënshkruar herë pas here prokurime në shkelje të ligjit që janë vlerësuar nga Open Data me “Flamur të kuq”. Sikur duket dhe në dokument, këto tenderë janë për shërbime fasadë që duhet të ishin bërë me kohë nga bashkia. Ndërkohë, që Bardh Spahia po “ndriçon” rrugën e korrupsionit, SPAK-u akoma nuk i sheh këtu “kryevepra” të kryebashkiakut.
Lexo edhe: Spahia: Shkodra, gati për protestën e madhe të 3 Marsit
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post