Deputeti i PD-së Edmond Spaho ka komentuar sot deklaratën e djeshme të presidentit Ilir Meta, i cili tha se Basha ka qenë ai që nuk donte të merrte pjesë ne zgjedhje e 30 qershorit në 2019 nga frika e humbjes. Përmes një interviste televizive, Spaho u shpreh se Meta tha një të vërtetë sa i përket kësaj çështje. Spaho tregoi se dhe ndërkombëtarët i kanë kërkuar PD që të marrë pjesë në garë dhe të luaj siç duhet rolin e saj.
“Presidenti Meta e shprehu qartë që kjo është çështje e brendshme e PD, nuk i takon të ndërhyjë, qëndrim korrekt. Për disa akuza ai mbajti qëndrimet e tij publike. Nuk kam qenë në Gjermani, pasi flitet për një takim në Gjermani. Di që në prill 2018 një delegacion nga PD jemi ftuar në Bundestagun gjerman dhe nga i pari tek i fundit, të vetmen gjë që na kanë kërkuar me insistim është të rrimë në institucione. E njëjta gjë është kërkuar dhe nga kancelaria e znj. Merkel nga drejtori për politikën e jashtme”, tha Spaho.
Sipas tij, Basha bëri gabim që e la PD-në jashtë gare dhe po i paguan sot kostot e këtij veprimi. Madje ai shtoi se ka pasur edhe debate brenda PD mes Bashës dhe të tjerë për hapat që ai ndërmerrte. “Zoti Meta foli për variantin e tij, për sa i takon PD-së ne kemi deklaruar se nuk do të zhvillohen zgjedhje më 30 qershor. Ne ceduam nga ky pozicion dhe zgjedhjet u zhvilluan. Madje deklaruam se më 30 qershor do bëhet nami, që do përleshemi në qendrat e votimit që nuk është fare normale. Ne bëmë zgjedhje të gabuar për të cilat po paguajmë çmimin për këto zgjedhje të gabuara.
Ajo që mund të them unë është që përveç atij diskutimi formal që është bërë për lënien e mandateve, nuk di ndonjë vendim tjetër të rëndësishëm, reforma territoriale, hyrjen në çadër, marrëveshjen e majit që ne të kemi bërë debat në institucionet që ka PD, në kryesi, këshill Kombëtar apo në grupin parlamentar”, tha ish-nënkryetari i PD”, tha Spaho.
Sa i përket zgjedhjeve të 13 tetorit, që kërkoi Basha më pas ai tha se aleatët u regjistruan pas konsultimit me PD, ndërkohë që PD nuk shkoi në KQZ pasi prisnin shqyrtimin e 30 qershorit. “Aleatët janë regjistruar jo me dëshirën e tyre por pasi u konsultuan me PD. Shkuan u regjistruan të gjithë me miratimin tonë dhe më pas ne vetë nuk u regjistruam. Kjo do të ndihmonte në shqyrtimin e rastit të zgjedhjeve të 30 qershorit nga Komisioni i Venecias për vendimin që mori”, tha ai. Sa i përket përqasjeve Basha-Berisha, ai tha se është më mirë që të dy të lënë mënjanë fjalët e kota.
Discussion about this post