Nga tani e tutje, askush nuk do të mund të bëhet pjesë e Policisë së Shtetit pa kaluar më parë në filtrin e Prokurorisë së Posaçme (SPAK). Ky është rregulli i ri i vendosur nga Akademia e Sigurisë, që kërkon të garantojë integritetin dhe pastërtinë e figurës së çdo kandidati që synon të veshë uniformën blu.
Çdo aplikant duhet të dorëzojë një kërkesë pranë SPAK, përmes postës, për të verifikuar nëse është nën hetim apo ndjekje penale. Brenda 7 ditëve, SPAK është i detyruar të japë një përgjigje zyrtare. Pa këtë dokument, aplikimi nuk mund të vazhdojë.
Krahas kësaj, verifikime shtesë do të kryhen edhe nga prokuroritë dhe gjykatat e zakonshme, për të zbuluar çdo lidhje të mundshme me veprimtari kriminale apo çështje të pazgjidhura në sistemin e drejtësisë.
Kjo masë vjen si reflektim ndaj rasteve të shumta të zbuluara gjatë viteve të fundit, ku efektivë policie janë përfshirë në aktivitete të paligjshme ose kanë pasur kontakte të dyshimta me botën e krimit. Autoritetet synojnë që me këtë skaner të ri të parandalojnë çdo kompromis me besimin që qytetarët duhet të kenë tek forcat e rendit.
Discussion about this post