Prokuroria e Posaçme kundër Korrupsionit dhe Krimit të Organizuar ka dalë me njoftim zyrtar për arrestimin e i ish-deputetit socialist Alqi Bllako. Sipas SPAK, vendimi i masës arrest me burg është ekzekutuar mëngjesin e sotëm në orën 03:30, në shtëpinë e Bllakos.
Në një njoftim zyrtar, SPAK përshkruan të gjithë itinerarin për arrestimin e Bllakos që nga momenti i dërgimit të shkresës në Kuvend për heqjen e imunitetit, deri në momentin e arrestimit të tij.
Sipas SPAK, ish deputeti akuzohet për kryerjen e veprave penale “Shpërdorimi i detyrës”, në bashkëpunim dhe “Korrupsioni pasiv i funksionarëve të lartë shtetërorë ose i të zgjedhurve vendorë”, të parashikuara nga nenet 248, 25 dhe 260 të Kodit Penal, pasi rezulton i përfshirë në aferën e inceneratorëve.
Bllako, në bashkëpunim me ish Ministrin e Mjedisit Lefter Koka dhe një tjetër zyrtar të Ministrisë, ku ai ka patur detyrën e Sekretarit të Përgjithshëm, kanë përgatitur dokumentacion të falsifikuar në lidhje me të dhënat e pronës së shpronësuar, për ndërtimin e inceneratorit të Fierit, duke ndryshuar cilësimin nga “arë” në “tokë truall”, duke rritur vlerën e shpronësimit.
Po ashtu ai dyshohet se ka favorizuar shoqërinë përfituese të koncensionit, në këmbim “të përfitimeve të parregullta” me një vlerë prej afro 150 mijë dollarë, të cilat kanë shkuar në formën e pagesave të larta mujore për babanë e tij, i punësuar pranë inceneratorit të Tiranës.
Discussion about this post