Prokuroria e Posaçme Kundër Korrupsionit dhe Krimit të Organizuar (SPAK) ka reaguar pas ngjarjes së rëndë të ndodhur sot në Gjykatën e Apelit në Tiranë, ku gjyqtari Astrit Kalaja u vra me armë zjarri brenda në sallën e gjyqit, ndërsa dy persona të tjerë mbetën të plagosur.
Në një deklaratë për mediat, SPAK dënon me forcë aktin e rëndë, të cilin e cilëson si të paprecedentë dhe si një sulm të drejtpërdrejtë ndaj sistemit të drejtësisë dhe shtetit ligjor.
“Prokuroria e Posaçme dënon me forcë vrasjen e paprecedentë të gjyqtarit Astrit Kalaja, ngjarje që ndodhi brenda ambienteve të Gjykatës së Apelit, Tiranë. I shprehim ngushëllimet tona familjes së gjyqtarit Kalaja, të afërmve dhe kolegëve të tij në këtë moment të dhimbshëm.”
SPAK shpreh gjithashtu solidaritet të plotë me gjyqtarët, prokurorët, avokatët dhe punonjësit e sistemit të drejtësisë, duke nënvizuar nevojën urgjente për rritjen e masave të sigurisë në ambientet gjyqësore.
“Ky akt i rëndë duhet të shërbejë si thirrje urgjente për rritjen e sigurisë në gjykata, forcimin e masave mbrojtëse për gjyqtarët, prokurorët, avokatët dhe punonjësit e drejtësisë si edhe për një reagim të shpejtë institucional, për të ndaluar përsëritjen e akteve të ngjashme”, thuhet në deklaratë.
Prokuroria e Posaçme i ka uruar shërim të shpejtë edhe dy qytetarëve të plagosur gjatë incidentit, ndërsa thekson se mbrojtja e jetës dhe e integritetit të punonjësve të drejtësisë është prioritet absolut i shtetit ligjor.
Discussion about this post