Katër zyrtarë të zyrës “Interpol Tirana” janë marrë në pyetje nga hetuesit e Strukturës së Posaçme kundër Korrupsionit dhe Krimit të Organizuar. Ata kanë qenë subjekt i SPAK-ut në marrjen e dëshmive të tyre në kuadër të dosjes së ish-deputetit të Partisë Socialiste, Jurgis Çyrbja. Qëllimi i marrjes në pyetje ishte vetëm një; që hetuesit të zbulojnë se cili prej tyre ishte “furnizuesi” me informacione për ish-deputetin, pasi dikush e informonte lidhur me të dhënat që merreshin nga sistemi TIMS.
Siç bëhet me dije nga “OraNews”, një prej tyre ka deklaruar para Prokurorisë së Posaçme se kompjuteri qëndronte i hapur 24 orë në 7 ditë të javës pasi oficeret hynin për të parë materialet e ardhura dhe printimet e tyre.
“E dija se kush ishte emri i përdoruesit dhe i fjalëkalimit të këtij kompjuteri, pasi ishte i vendosur i shfaqur në një tabelë, por nuk isha unë e vetme që e dija këtë pasi edhe specialistët koordinatorë dhe operatorët 24/7 e dispononin,”- tregon zyrtari policor.
Por kështu kanë lënë që të kuptohet se të dhënat mund të jenë nxjerrë nga struktura të tjera të Policisë, që gjithashtu mund të ishin në dijeni të informacioneve “sekrete”.
“Pasi një shtet anëtar i Interpol sillte në rrjet një email ku bënte me dije se një shtetas shqiptar ishte shpallur në kërkim ndërkombëtar, sipas procedurës standarde të veprimit në atë kohë për të cilën pyetem, duhet që për 24 orë nga zyra jonë të kalohej në departamentin e Policisë Kriminale dhe Drejtorinë e IT për ta shpallur në sistemin TIMS,”- ka thënë një tjetër zyrtar policor për prokuroret e SPAK.
Një tjetër ka thënë: Dua të bëj me dije se fjalëkalimin e kompjuterit 24/7 nuk disponohej vetëm nga ana ime si operator, apo kolegët e mi të kësaj zyre, por edhe nga oficerët specialist koordinatorë, pasi ata hynin në këtë sistem për të parë materialet e ardhura dhe printimin e tyre.
Ndërsa po një koleg i tyre ka bërë me dije se regjistrik elektronik nuk ishte më funksional.
“Regjistri ynë elektronik në Excel, në njohurinë time, nuk është më funksional pas sulmit kibernetik që patën kompjuterat e Policisë së Shtetit.”
Kështu pritet që në ditët në vijim të ketë personazhë të tjerë të marrë në pyetje. Madje, për të zbuluar informatorin, Prokuroria e Posaçme ka ndarë një fraksion të dosjes ku do të kryejë një sërë veprimesh hetimore për të zbuluar se cili efektiv i jepte informacionet Jurgis Çyrbjas, i cili informonte më pas grupin e Altin Hajrit për aksionet e Policisë./ZËRI
Discussion about this post