SPAK ka kërkuar 4 vite dhe 6 muaj burg për ish gjyqtaren e Korçës, Mimoza Markgjeka. Po ashtu janë kërkuar 4 vite burg për bashkëshortin e saj Arben Carën dhe 3 vite për Skënder Demirin.
Ish-gjyqtarja e Apelit të Korçës Mimoza Margjeka, e shoqëruar nga bashkëshorti i saj njëkohësisht i bashkëpandehur, do të njihet sot me prentencën e Prokurorisë së Posaçme. Margjeka është paraqitur sot pranë kësaj strukture, ndërkohë që është nën akuzë për korrupsion për lirimin e një të paraburgosuri.
Konkretisht nga SPAK, gjyqtarja akuzohet për veprën penale “korrupsion pasiv të qytetarëve, prokurorëve dhe funksionarëve të tjerë të organeve të drejtësisë”.
Bashkë me gjyqtaren kanë kaluar për gjykim edhe Arben Cara, Nejton Bali, Klaudjo Zhilla dhe Skënder Demiraj. SPAK akuzon se të pandehurit Nejton Bali, Klaudjo Zhilla dhe Skënder Demiraj, në bashkëpunim me njëri-tjetrin i kanë dhënë Margjekës, ndërkohë që ushtronte funksionet në Gjykatën e Apelit Korçë, nëpërmjet bashkëshortit të saj, Arben Carës, një shumë parash prej 6 000 eurosh.
Kjo shumë parash është dhënë me qëllim ndryshimin e masës së sigurimit nga ajo e “arrestit në burg” në atë të “garancisë pasurore” për Orion Balin, i cili është arrestuar për veprën penale të “Ndihmë për kalim të paligjshëm të kufijve”.
Në shkëmbim të përfitimit të paligjshëm, sipas organit të akuzës ka rezultuar se Gjykata e Apelit Korçë ka ndryshuar masën e sigurimit nga “arrest në burg” në atë të “garancisë pasurore” për Balin.
Vetë Markgjeka pretendoi se arrestimi i saj erdhi pasi i refuzoi mandatin ish-kryebashkiakes së Durrësit, Valbona Sako e dalë nga zgjedhjet e 30 qershorit të 2019. Madje Margjeka deklaroi se ato zgjedhje ishin nul.
Discussion about this post