SPAK ka lëshuar disa urdhër arreste në lidhje me Inceneratorin e Tiranës.
Mësohet se urdhër-arreste janë lëshuar për shtetasit për Denisa Tollkucin, Dashamir Ymeraj e Endrit Habilaj. Urdhër-arreste janë lëshuar edhe për tre shtetas të huaj. Asnjeri prej tyre nuk është arrestuar deri me tani.
Inceneratori i Tiranës është sekuestruar nga SPAK në verën e vitit 2023, pasi nga hetimet, rezultoi se kompania e cila fitoi koncesionin për ndërtimin e inceneratorit me vlerë 128 milionë Euro, ka si pronarë biznesmenët Mirel Mërtiri e Klodian Zoto. Të dy këta të fundit, të shpallur në kërkim ndërkombëtar për inceneratorin e Fierit dhe Elbasanit.
Hetimet e Prokurorisë së Posaçme treguan se një rrjet i gjerë zyrtarësh publikë nga institucione qendrore dhe lokale u vunë në dispozicion të interesave të biznesit që ka kushtuar deri më sot rreth 100 milionë euro.
Disa muaj më parë, në Dhjetor 2023, SPAK lëshoi 15 urdhër-arreste për inceneratorin e Tiranës, mes të cilëve zyrtarë të Bashkisë së Tiranës dhe ish-zyrtarë të Ministrisë së Mjedisit. Arrest në burg u caktua për Taulant Tushën, drejtor në Bashkinë e Tiranës. Në të njëjtën masë u vendos edhe ish-ministri i Mjedisit, Lefter Koka, i dënuar për 2 koncensionet e tjera të inceneratorëve, si dhe ish-Sekretari i kësaj ministrie, Alqi Bllako.
Pjesa tjetër e personave që u akuzuan janë anëtarë të komisioneve përzgjedhëse të koncensionit.
Edhe 2 biznesmenët Mirel Mërtiri dhe Klodian Zoto janë nën hetim për inceneratorin e Tiranës.
Lidhur me rastin është pyetur në SPAK edhe kryebashkiaku i Tiranës, Erion Veliaj, i cili cilësohet nga opozita “pronari faktik i inceneratorit”. Megjithatë, deri në këtë fazë të hetimeve, nuk ka një masë kundrejt tij.
Discussion about this post