Kryedemokrati Lulzim Basha ripërsërit akuzat e tij për çështjen e inceneratorëve dhe u shpreh se Lefter Koka është vetëm bishti i kësaj afere sipas tij, teksa kurbani i radhës po bëhet gati që të shpëtohen përgjegjësit e vërtetë.
“SPAK duhet që të përdorë instrumentat e ligjit në mënyrë që të mos u paguhet asnjë qindarkë grupit kriminal me një kokë. Kërkoj arrestimin e kokës, nuk mjafto arrestimi i bishtit dhe i shpalljes në kërkim të administratorëve, Kurbani i radhës po bëhet gati për ketë aferë me qëllim shpëtimin e kokës, por nuk ka shqiptar që mund të besojë se e gjithë kjo skemë mund të bëhej pa miratimin e Edi Ramës”, ka thënë Basha.
Basha në fjalën e tij është shprehur se inceneratori i Elbasanit është një ndër shkeljet më të dukshme dhe korruptive pasi çdo vendim ka kaluar vetëm në një ditë dhe nuk ka as ligj dhe as procedurë të ndjekur për këtë incenerator.
“Nëse për Tiranën dhe Fierin faktet tregojnë sesi janë shkelur me këmbë ligjet e shtetit dhe procedurat për Elbasanin nuk ka fare as ligje as procedura. Siç themi ne nuk është ndërtuar as në tokë të babës, por për të mbuluar ngritjen e kësaj kërpudhe mafioze brenda një dite janë kaluar 17 akte zyrtare janë mbyllur të gjitha për 8 orë. Brenda ditës është hapur procedura, është lidhur kontrata, është kaluar procedura, dhe kanë marrë mendimin e të gjithë ministrive dhe institucioneve përkatëse”, ka shtuar ai.
Kreu i PD-së ndër të tjera është shprehur se është e qartë që koka e gjithë kësaj afere është Rama, ndaj kërkon nga SPAK që të marrë seriozisht hetimet në lidhje me këtë drejtim dhe përgjegjësit të vihen para ligjit.
“SPAK duhet të veprojë sot me arrestimet e përgjegjësve, mos të presë që Rama ti shkarkojë ministrat e më pas ti arrestojë. Edi Rama ka bërë gati kurbanin e radhës për këtë aferë, me shpresën që të shpëtojë vetë. Por s’ka shqiptar që nuk e di që një skeme e tillë korruptive, nuk bëhej pa miratimin e Edi Ramës”, tha Basha.
Discussion about this post