Të paktën 5 persona, punonjës të SASPAC (Agjencia Shtetërore e Programimit Strategjik dhe Koordinimit të Ndihmës), institucion që drejtohej nga Ilir Beqaj deri në fund të nëntorit 2023, po hetohen nga SPAK me akuzën e korrupsionin pasiv.
Nga raportimet mësohet se me urdhër të SPAK janë kryer kontrolle në banesat e 5 personave, por edhe në zyrat e SASPAC, ku janë sekuestruar pajisje kompjuterike, por edhe telefonat e personave nën hetim. Gjithashtu raportohet se personat kanë qenë në përgjim, bazuar në një vendim të lëshuar nga GJKKO.
Dyshohet se këta persona lëshonin fatura fiktive kundrejt subjekteve të ndryshme, me një vlerë disa miliona euro.
Hetimi në fjalë nuk ka lidhje me çështjet që po hetohet ish-ministri i Shëndetësisë, Ilir Beqaj, për të cilin SPAK ende nuk ka ngritur një akuzë përsa i takon koncensioneve në shëndetësi, edhe pse gjatë ditës së djeshme dhe të sotme, janë raportuar kontrolle në disa prej kompanive farmaceutike.
SPAK po heton Beqajn për koncensionin e sterilizimit, ndërkohë që një tjetër koncension, ai i check up është gjithashtu në hetim.
Dhe në kuadrin e hetimeve që po kryhen nga SPAK nuk ka shpëtuar as SASPAC, agjensia që drejtohej nga ish-ministri i Shëndetësisë, i cili u detyrua të japë dorëheqjen, pasi GJKKO caktoi dy masa sigurie ndaj tij: detyrim paraqitje dhe ndalim të udhëtimeve jashtë vendit.
Gjatë ditës së sotme në një njoftim, Beqaj shprehej se Saspac nuk menaxhon fonde, nuk bën tendera dhe nuk kryen procese vendimmarrëse, por vetëm koordinon programet me financim të huaj në funksion të qeverisë. Sipas tij, puna e saj si agjenci ka të bëje vetëm me koordinimin e politikave të qeverisë me donacionet nga jashtë vendit.
Discussion about this post