Egnatia dhe Vllaznia ndanë pikët pas një barazimi dramatik 2-2, në sfidën e javës së 31-të në Superiore.
Egnatia kaloi në avantazh në minutën e 20-të me një gol të Regi Lushkjas, duke mbyllur pjesën e parë në epërsi.
Vllaznia reagoi në pjesën e dytë me golin e Esat Malës në minutën e 80-të, duke barazuar shifrat në 1-1. Vetëm gjashtë minuta më vonë, Fernando Medeiros riktheu avantazhin për Egnatian.
Megjithatë, Vllaznia arriti të sigurojë një pikë të vlefshme me një penallti të shënuar nga Ildi Gruda në minutën e 90-të.
Me këtë barazim, Egnatia mban kryesimin me 55 pikë, ndërsa Vllaznia renditet në vendin e tretë me 51 pikë.
Trajneri i Vllaznisë, Thomas Brdaric doli në prononcim për mediat në fund të përballjes.
“Jam i lumtur, për ekipin që arritën të merrnin minimumin një pikë. Si e nisëm pjesën e parë, ishte shumë e ngadaltë, nuk kishim mundësi të ishim të rrezikshëm. Humbëm një top shumë të thjeshtë në mesfushë dhe Egnatia shënoi golin e parë. Në stadiumin e tyre ishte një atmosferë të nxehtë. Kemi një mentalitet të mirë dhe cilësi.
Kemi mundësi të përballojmë ekipe si Egnatia dhe Dinamo. Në pjesën e dytë kishim përmirësim dhe mund të fitonim ndeshjen. Që të bësh një qarkullim të mirë të topit, ishte e vështirë të bëhej në një fushë të rrëshqitshme. Ideja ishte që të mbanim më shumë topin, në pjesën e dytë bëmë ndërrime. Pas ndeshjes gjithmonë je më i zgjuar. Na duhet 100% konfidencë që të shkojmë në ndeshje për ta fituar, të ulim sa më shumë numrin e gabimeve. E lejojmë kundërshtarin të vijë në kundësulm me topa të humbur.
Në fund të ditës arritëm të tregojmë një fytyrë të mirë. Në kampionatin shqiptar çdo ndeshje është shumë e afërt dhe shumë e ngushtë, jam okej me rezultatin. Dëmtimi i Balaj ishte diçka që nuk pritej, e zëvendësuam për 4 minuta. Ka një dëmtim në audiktorin e tij, shpresoj të mos ketë diçka serioze. Mensah bëri një ndeshje të mirë dhe i bëri një zëvendësim të mirë Bekimit.”, shprehet Brdaric.
Discussion about this post