Elisa Spiropali ka nisur takimet me strukturat e Partisë Socialiste në zonën e saj elektorale, duke dhënë një sinjal të drejtpërdrejtë për vijimin e aktivitetit politik në terren, në një moment të qartë përplasjesh me Ramën.
Në një postim në rrjetin social Facebook, Spiropali shkruan: “Kudo dhe kurdo me socialistët, për Shqipërinë siç i ka hije.”
Ky hap vjen një ditë pas reagimit të saj publik, ku deputetja artikuloi kritika të drejtpërdrejta për mënyrën e funksionimit të administratës dhe vendimmarrjes.
Në deklaratën e publikuar më 17 prill, Spiropali përmendi “drejtorokracinë” dhe theksoi se administrata detyrohet të zbatojë urdhra të paligjshëm nën presion eprorësh. Ajo shtoi se disa institucione “nuk i përgjigjen më ligjit, por klanit” dhe se vendimmarrja është përqendruar në pak individë.
Deklaratat e saj pasojnë përplasjet e regjistruara në mbledhjen e Asamblesë së PS më 28 mars në Pallatin e Brigadave.
Sipas burimeve nga mbledhja, Kryeministri Edi Rama i ndërpreu fjalën deputetës duke iu drejtuar me këto fjalë: “Ti në prezencën time nuk komunikon, sidomos kur unë jam këtu.”
Përplasja vijoi edhe gjatë prezantimit të strategjisë së komunikimit nga ministrja Erjona Ismaili. Një reagim i Spiropalit u pasua me ndërhyrje dhe tension verbal. Në një moment tjetër, Rama i tha: “Mos më provoko se do të nxjerr jashtë.”
Këto ishin përplasjet e para mes Ramës dhe Spiropalit të cilat u bënë publike dhe morën vëmendjen e opinionit dhe medias.
Spiropali mbante më parë postin e ministres për Evropën dhe Punët e Jashtme dhe u zëvendësua nga diplomati Ferit Hoxha, në një lëvizje që u formalizua në ndryshimet e qeverisë.
Nisja e takimeve në terren pas këtyre zhvillimeve vendos një vijë të qartë veprimi nga Spiropali, e cila nuk kufizohet në reagime publike, por po vijon aktivitetin me strukturat e partisë në bazë.
Discussion about this post