Deputetët e PS bojkotuan këtë të martë, për të tretën herë radhazi, komisionin hetimor për koncesionet e “Check up-it” dhe “Sterilizim-it”.
Ligjvënësit demokratë akuzuan ata socialistë se me urdhër të kryeministrit Edi Rama po tentojnë të mbulojnë aferat në dy koncesionet me mosprezencën në komisionin hetimor.
Kryetarja e komisionit Albana Vokshi tha se nga ana e PD do i dërgohet një letër Kuvendit, në të cilën do të listohen shkeljet ligjore që sipas saj janë konsumuar nga socialistët me mospjesëmarrjen në komisionin hetimor. Po ashtu, shtoi se do i kërkohet në mënyrë shkresore kryeparlamentares Lindita Nikolla që të sigurohet pjesëmarrja e palës tjetër, të zëvendësohen anëtarët e komisionit në konflikt interesi si edhe deputetët socialistë të cilët do vijojnë me bojkotin.
Deputetja demokrate Ina Zhupa deklaroi se ligjvënësit socialistë po bojkotojnë vendimmarrjen e Kuvendit: “Të votosh për të ngritur dhe më pas të mos vish për të”. Sipas saj, duke zgjedhur rrugën e bojkotit, socialistët “po shpërdorojnë përgjegjësinë para shqiptarëve për të cilën paguhen me taksat e tyre”.
Ndërsa deputeti i PL-së Petrit Vasili e quajti “banditizëm të vërtetë kushtetues” mospjesëmarrjen e socialistëve në komision.
Në fund të seancës që zgjati gati 19 minuta, Vokshi lajmëroi se shkresat për kërkesën informacioni janë dërguar në institucionet përkatëse, ndërsa shtoi se po punohet për të tjera shkresa. Kryetarja e komisionit bëri me dije se seanca e radhës do të zhvillohet të premten.
Ndërkohë, socialistët pretendojnë se ka shkelje nga ana e opozitës në anën procedurale të punës së komisionit. Shkeljet e pretenduara ata i listuan në një shkresë drejtuar opozitës javën e kaluar.
“Te Sterilizimi ka përgjegjësi penale dhe Manastirliu, Beqaj vijon të marrë tendera”
Në një deklaratë për mediat pas seancës, Vokshi përsëriti akuzat ndaj mazhorancës. “E kanë ngjitur komisionin hetimor për ta dështuar për ta bllokuar. Nuk duan të zbardhen dy nga aferat më të mëdha në Shëndetësi, Check up-i dhe Sterilizimi”, u shpreh.
Duke iu referuar rregullores për komisionet parlamentare, ajo u shpreh se prania në komision është e detyrueshme, ndërsa shtoi se nëse në mënyrë të përsëritur, mungon një ose më shumë se deputetë, merren masa zëvendësimin e tyre.
Vokshi tha se si dëshmitarë në këtë komision është caktuar të thirren mes të tjerëve, kryeministri Edi Rama, Ish-ministrat e Shëndetësisë Ilir Beqaj dhe Ogerta Manastirliu, ish-ministrat e Financave, Shkëlqim Cani dhe Anila Denaj, ministrja aktuale Albana Koçiu dhe ish-zëvendësministri i Shëndetësisë Klodian Rrjepaj.
Sipas Vokshit, për sterilizim ka përgjegjësi penale dhe Ogerta Manastirliu.
Ajo shprehu qëndrimin se SPAK ka amnistuar Ilir Beqjan me akuzën e ngritur ndaj tij, ndërsa shtoi se ai vijon të përfitojë para publike përmes procedurave të prokurimit.
“Qëllimi jonë është që ndihmojmë edhe SPAK. GKKO e ka kthyer mbrapsh dosjen në SPAK për të thënë heto Ilir Beqajn, sepse Beqaj ka rol shumë herë më të madh dhe ka shkaktuar dëm shumë herë më të madh sesa ata që janë në burg. Ndërkohë Ilir Beqaj shëtit nga mëngjesi në darkë në gjithë rrugët e Tiranës dhe vazhdon merr tendera. Para tre ditësh Ilir Beqaj ka marrë tenderin e radhës me INTECH plus, 320 milionë lekë. Jo vetëm, që çohet për shpërdorim detyre”, tha Vokshi.
Ajo u shpreh se PD nuk është tërhequr as nga kërkesa për komision hetimor për dy koncesionet e tjera në Shëndetësi – atë të shërbimeve laboratorike dhe hemodializës.
Discussion about this post