Për të dytën herë radhazi, deputetët e Partisë Socialistë kanë bojkotuar mbledhjen e komisionit hetimor për koncesionet për shëndetësi.
Edhe këtë të premte, ashtu si dy ditë më parë, ata zgjodhën të mos paraqiten në mbledhje. Përmes një shkresë zyrtare drejtuar kolegëve të opozitës, ata shprehen se kryetarja e komisionit duhet të komunikojë me anëtarët për datën, orën, vendin dhe rendin e ditës. Procedurë kjo e fundit që sipas palës mazhoritare nuk është respektuar nga Albana Vokshi e PD.
Po ashtu theksohet se “vetëm pas miratimit të planit të hetimit të propozuar nga ekspertët, Komisioni deklaron fillimin e hetimeve” dhe se Vokshi nuk ka depozituar asnjë dokument të relatuar në Sekretarinë e Komisionit. Sipas PS, këto e të tjera janë arsyet e mospjesëmarrjes së tyre në mbledhje.
Ndërkohë, kryetarja e komisionit Albana Vokshi mohoi akuzat në mbledhjen e sotme që zgjati pak minuta.
Ajo tha se tha se Edi Rama dhe të tijtë kanë frikë nga hetimet e komisionit, prandaj dhe kanë zgjedhur të mos jenë të pranishëm.
“Edi Rama dhe anëtarët e PS në Komision nuk kanë ardhur, pasi kanë frikë nga ky Komision. Maxhoranca po shkel përditë ligjet dhe Kushtetutën. Është kjo qeveri që ka frikë nga gjithçka, pasi ka abuzuar me pushtetin në 10 vite. Ne nuk kemi kohë për të humbur, hetimi duhet të nisë sa më parë”, u shpreh Vokshi.
Më tej, në një komunikim me gazetarët, ajo bëri me dije se deputetët e opozitës kanë përgatitur një sërë kërkesash për informacion, që do depozitohen në institucionet përkatëse.
Discussion about this post