Ambasadori i Turqisë në Tiranë, Murat Ahmet Yoruk ka sulmuar ditën e djeshme strukturat gyleniste në Shqipëri. Ditën e djeshme gjatë një vizitë që ka bërë në “Parkun e Demokracisë 15 Korriku” në kodrat e Liqenit, Yoruk ka thënë se lufta e Turqisë kundër FETO-së, vazhdon të jetë me të njëjtën vendosshmëri. Ai u shpreh se FETO-të nuk përbëjnë kërcënim vetëm për Turqinë por për të gjitha vendet e tjera, pasi ata duan të shtrijnë në dorë të gjithë pushtetin. Këtë fjalim, ambasadori e mbajti në përkujtim të viktimave nga grushti i shtetit që u bë në 15 korrik të vitit 2016.
“Lufta jonë kundër FETO-s vazhdon me të njëjtën vendosmëri pothuajse në çdo skaj të botës. Kjo në fakt nuk është hakmarrje ndaj asaj organizate, por është një luftë kundër terrorizmit ndërkombëtar. Strukturat terroriste të lidhura me FETO-n, të fshehura nën petkun e arsimit, shëndetësisë si dhe ndihmave humanitare, duke ndjekur një axhendë shumë sekrete dhe të fshehtë shtohen si qeliza kancerogjene brenda strukturës shtetërore pothuajse në të gjithë vendet ku ushtrojnë veprimtari. Qëllimi i tyre është të shtinë në dorë shtetin, pushtetin, për këtë arsye FETO nuk është një kërcënim i madh vetëm për Turqinë, por për çdo vend ku ajo zhvillon aktivitet. Ne do të vazhdojmë luftën tonë me të njëjtën vendosmëri dhe vullnet derisa të gjithë terroristët me duar të përgjakura t’i dorëzohen drejtësisë”, tha ai.
Çfarë ndodhi në Turqi në 15 korrik?
Ushtria turke tentoi një grusht shteti në Turqi. Helikopterët e Ushtrisë kanë hapur zjarr fillimisht pranë selisë së Organizatës Kombëtare të Inteligjencës turke ku edhe kanë marrë kontrollin e saj. Mbi qiellin e kryeqytetit turk, janë parë të fluturonin avionë dhe helikopterë. Ushtria mori në kontroll aeroportet e Ankarasë dhe Stambollit si dhe mbylli dy urat e Bosforit, e cila u patrullua për 4 orë me radhë nga avionë dhe helikopterë të ushtrisë. Tanket e ushtrisë dolën nga kazermat gjatë pasdites së ditës së premte dhe rrethuan aeroportet dhe objektet strategjike në Ankara dhe Stamboll, ndërsa mbyllën të gjitha rrugët kryesore të lëvizjes së automjeteve.
