Rritja e çmimeve në vend ka prekur jo pak familjet shqiptare por edhe studentët e rretheve të cilët do t’u duhet të përballojnë të vetëm shpenzimet në kryeqytet për të vazhduar universitetin.
Rreth 5000 firma studentësh të mbledhura për 15 ditë për të kërkuar subvencionim prej 10 mijë lekësh nga rritja e çmimeve, u dorëzuan në kryeministri. Emiljando Kita, student që jeton në shtëpi me qira, thotë se për shkak të çmimeve të larta, studimet ka jashtë prioriteteve. Energjitë dhe kohën, i ka përqendruar tek dy punët që kryen, për të përballuar shpenzimet.
“Tashmë nuk është më prioritet i parë dhe i dytë, tashmë arsimi është prioritet i tretë duke u munduar thjesht ta mbyll shkollën. Pra ne po prodhojmë student të diplomuar të cilët dhe nuk janë të aftë sepse janë detyruar të punojnë që në vit të pare dhe kanë lënë në plan të fundit universitetin. Ne vijmë në Tiranë nga rrethet me 100 mijë halle ,probleme dhe rrapatemi këtu në Tiranë duke punë nga më të ndryshmet. Do ishte turp të mos jap një bonus studentor e cila është dhënë në Kosovë që I ka tarifat 0 tashmë. Në Greqi u dha ndihma sociale dhe prapë në Greqi tarifat janë zero, kostoja e studentëve është zero sepse nuk paguan as konvikte e as menza”, tha Emiljando Kita, student.
Studentët paralajmërojnë protesta masive, në rast se qeveria nuk u ofron paketë financiare.
“Duhet të kthehen sytë edhe nga studentët. Duke qenë se ne jemi e ardhmja, duhet të jemi më të bashkuar dhe unë i bëj thirrje kryeministrit dhe studentëve për reagim dhe jo heshtje për të drejtat tona.”
“Duke bërë peticione ,duke bërë kërkesa në mënyrë që të jemi gati ditën kur studentët të revoltohen dhe të dalin në rrugë. Atë ditë do të jemi aty për të shfryrë mllefin studentor.”
Ata i kanë lënë 10 ditë afat qeverisë për miratimin e vendimit për akordimin e shumës prej 10.000 lekë për secilin prej tyre.
Discussion about this post