Vaksinat anti-Covid janë më pak efektive tek njerëzit me sistem imunitar të dobët, kjo sipas tre studimeve italiane, të cilat ekspertët thonë se nxjerrin në pah nevojën për të injektuar doza përforcuese për këtë grup të cënueshëm njerëzish.
Sipas Reuters, studimet tregojnë se mesatarisht, 30% e pacientëve me imunitet të dobët nuk zhvillojnë imunitet ndaj virusit pas vaksinimit. 70% i përgjigjen vaksinës, veçanërisht pas dozës së dytë, por në një masë më të vogël sesa njerëzit e shëndetshëm dhe me dallime nga grupi në grup.
Studimet u kryen midis një grupi prej 21 pacientësh me sëmundje bashkëshoqëruese, 34 fëmijë dhe të rritur që i nënshtrohen transplantit të zemrës dhe mushkërive, dhe 45 të rinjve me transplant të mëlçisë dhe veshkave. Rezultatet tregojnë nevojën për të rritur nivelin e mbrojtjes së personave më të prekshëm me doza përforcuese.
“Rezultatet e studimeve tona tregojnë se është thelbësore të mbrohen kategoritë më të brishta duke administruar dozën e tretë të vaksinës, duke kalibruar dozat ose duke iu drejtuar formulimeve të reja të vaksinës për të rritur përgjigjen imune ndaj virusit dhe për ta ruajtur atë me kalimin e kohës, “tha profesor Paolo Palma, kreu i imunologjisë klinike dhe vaksinologjisë në Bambino Gesu.
Gjetjet vijnë pasi Agjencia Evropiane e Barnave (EMA) pritet të njoftojë vendimin e saj nëse do të rekomandojë një dozë të tretë të vaksinës. Nuk ka konsensus midis shkencëtarëve se sa gjerësisht duhet të vendosen përforcuesit. Shtetet e Bashkuara, Britania dhe Izraeli kanë nisur programe nxitëse, por vetëm Izraeli po administron injektime shtesë për të gjithë popullsinë.
