Një kërkim i brendshëm i shoqërisë me seli në Menlo Park, i publikuar në “Wall Street Journal”, tregon se shoqëria e Zuckerberg është në dijeni që rrjeti social i fotove mund të shkaktojë çrregullime në të ngrënët dhe depresion. Por nuk bën asgjë për ta rregulluar këtë gjë
Lajmi bombë u publikua në “Wall Street Journal”, e cila mundi të marrë rezultatet e disa studimeve të kryera në një fshehtësi të plotë nga kompania me seli në Menlo Park. Studimet zbulojnë një epilog të fortë: Facebook është në dijeni të faktit se Instagram është i dëmshëm për shëndetin mendor të vajzave adoleshente.
Rrjeti social i fotove me filtra, i blerë nga Facebook për 1 miliard dollarë në vitin 2010, duket se ka efekte shkatërruese në psikikën e shumë vajzave adoleshente. Sipas kërkimeve, të kryera nga vetë shoqëria e Mark Zuckerberg, një vajzë në tre, e cila ka një account në Instagram, zhvillon shqetësime të perceptimit të trupit të saj.
Madje të gjithë grupet e analizuara akuzuan spontanisht rrjetin social se shkakton ankth dhe një rritje të tendencave depresive. Një katastrofë. Veçanërisht, nëse përfshihet në një kontekst potencial – edhe disa kohë më parë, Facebook e ka menduar gjatë idenë për të propozuar një version të Instagram për minorenët 13 vjeç. Këtë ide, Kongresi Amerikan e ka refuzuar qartë, që në fillim.
Dhe është e çuditshme të mendosh se Facebook ishte plotësisht në dijeni për dëmin e krijuar nga Instagram tek adoleshentët, ndërkohë që mendonte për një version të dedikuar për fëmijët nën 13 vjeç. “Nga kërkimi ynë pamë se përdorimi i aplikacioneve sociale për t’u lidhur me njerëzit mund të ketë përfitime pozitive për shëndetin mendor” – tha Mark Zuckerberg në një seancë dëgjimore në Kongres në mars të 2021. Por kur u pyet për fëmijët dhe shëndetin mendor, duket se është krejt e kundërta.
Rasti i Anastasia
Hetimi i “Wall Street Journal” tregon për një adoleshente, Anastasia Vlasova, e cila nisi të shkojë te një psikologe. Ajo ka zhvilluar një çrregullim në të ushqyer dhe i ka idetë e qarta se çfarë e ka çuar në këtë gjendje – koha në Instagram. Anastasia është bërë pjesë e rrjetit social që 13 vjeç dhe thuajse çdo ditë ka kaluar tre orë në rrjetin social, e magjepsur nga jeta dhe trupi, në dukje i përsosur, i influencer të fitnessit.
“Kur u regjistrova në Instagram – tregon vajza, sot 18 vjeç – të gjitha ato që kam parë ishim imazhe të trupave të përsosur”. Dhe me sa duket, rasti i Anastasia është një fakt shumë i zakonshëm. Kërkuesit e Instagram, të cilët që prej vitit 2019 nisën të studionin efektet e padëshirueshme të platformës, zbuluan një kuti “Pandore”.
“32% e vajzave adoleshente pohoi se sa keq ndiheshin për trupin e tyre, dhe Instagram e përkeqësonte këtë ndjesi” shkruhej në një paragraf të këtij studimi “top sekret”, që qarkullonte prej kohësh në zyrat e Facebook. Në një tjetër shkruhej se “adoleshentet fajësonin Instagram për rritjen e ankthit dhe depresionit. Ky reagim ishte spontan dhe i qëndrueshëm te të gjitha grupet”. Madje, në mesin e adoleshentëve që kanë shprehur mendime vetëvrasje, disa prej tyre kanë dëshirën ta bëjnë këtë në Instagram.
Facebook nuk e trajton problemin
Dokumentet – shkruan “Wall Street Journal” – tregojnë edhe se Facebook ka bërë pak përpjekje për t’u përballur me këto probleme dhe i zvogëlon ato në publik. Kjo ka shumë të ngjarë sepse në Menlo Park e dinë mirë se Instagram është aplikacioni me rritjen më të madhe në të gjithë grupin, dhe zgjerimi i grupmoshës së përdoruesve të rinj është jetik për më shumë se 100 miliardë dollarë të ardhura të kompanisë, të cilat nuk mund të rrezikohen.
Sot, më shumë se 40% e përdoruesve të Instagram është më pak se 22 vjeç. Janë rreth 22 milionë adoleshentë me akses sot në Instagram në SHBA, krahasuar me 5 milionë adoleshentë me akses në Facebook, ku numri i përdoruesve të rinj në këtë rrjet social është në rënie prej dhjetë vjetësh. Mesatarisht, adoleshentët në SHBA kalojnë 50% më shumë kohë në Instagram se në Facebook. Ky është një fenomen në mbarë botën, jo vetëm amerikan.
Çrregullimet në të ngrënët dhe depresioni
Studimi i Facebook, i mbajtur i fshehtë në këta muaj, tregon se në Instagram, tendenca për të ndarë vetëm momente të mira, presioni për t’u dukur i përkryer, i ndërthurur me një produkt që krijon varësi mund t’u shkaktojnë adoleshentëve çrregullime në të ngrënë, depresion dhe një ndjenjë të pashëndetshme për trupin e tyre.
/ Il Sole 24 Ore
