Kryebashkiaku Armando Subashit, pasi i shpëtoi SPAK-ut për inceneratorin e Fierit, po bën namin me tenderët publikë. Një nga këto është prokurimi me objekt “Blerje tubo betoni te armuara” me fond limit 17 759 100, 00 lekë. Gara për këtë prokurim është hapur sot (5 janar 2023) dhe pritet që të mbyllet më 20 janar 2023. Menjëherë Open Data Albania i ka dhënë këtij prokurimi “Flamurin e Kuq” dhe ka ngritur alarmin për korrupsion. Nga dokumentet mësohet se tenderi është anuluar më shumë se dy herë për boshllëqet dhe shkeljet. Por, pavarësisht kësaj, Subashi vazhdon skemën e tij dhe do t’ia japë këto 170 milionë lekë një klienti të preferuar.
Sipas rregullit, kur tenderi është anuluar më shumë se dy herë, ky prokurim duhet të mbyllet. Duket qartazi se arsyet e anulimit janë mungesa e interesit, risku për fondin limit, boshllëqe në dokumentacionet, apo mungesa e konkurrencës. Kritere kur anashkalohen krijojnë hapësira për korrupsion.
Në fakt, nga kërkimet rezulton se çdo vit Subashi blen tuba betoni.
Dhe në çdo vit ka mbyllur tenderët pa garë dhe në shkelje të ligjit. Tenderi në 2020 ka qenë me vlerë 100 milionë lekë dhe tenderi në 2021 me vlerë 90 milionë lekë të vjetra. Në të dyja rastet kontratat janë renditur te prokurimet me “Flamur të Kuq”, për mungesë konkurrence.
Ndërkaq bie në sy se çdo vit fituese e këtij tenderi është firma KOLA INVEST SHPK, në pronësi të Jani Kola dhe Sofokli Kola. Pra, ka gjasa që edhe në rast kemi të bëjmë me fitues të paracaktuar.
Kështu, Subashi vazhdon avazin, ndërsa qeveria i bën lëvdata. Kujtojmë se në mbledhjen e fundit me krerët e Bashkisë, kryeministri Rama vlerësoi pozitivisht punën e Armando Subashit, duke thënë se ka mundur të shmang përmbytjen e shumë zonave në Fier. E megjithatë, tokat e Fierit përmbyten çdo vit nga Vjosa dhe Semani!
Lexo edhe: Armando Subashi, i munguari i madh në hetimin e inceneratorit Fier
Discussion about this post