Sulmet amerikane në Iran, Berisha: U asgjësua potenciali bërthamor i ajetollahëve

Kryetari i Partisë Demokratike, Sali Berisha reagoi sot pas sulmeve të Shteteve të Bashkuara të Amerikës në centralet bërthamore të Iranit.

Përmes një postimi në rrjetet sociale, Berisha e konsideroi këtë si një mundësi të re dhe një thirrje të fuqishme për iranianët në Iran dhe në botë që të bashkohen për një Iran të lirë dhe demokratik.

“Obliterimi, de facto asgjësimi mbrëmë i potencialit bërthamor të Ajetullahëve të Iranit nga fuqia ajrore e SHBA-së është një mundësi e re dhe një thirrje e fuqishme për iranianët në Iran dhe në botë të bashkohen për përmbysjen e diktaturës teokratike obskurantiste dhe për një Iran të lirë dhe demokratik”, u shpreh ai.

Avionët amerikanë sulmuan tre objekte bërthamore në Iran, duke përfshirë “Natanz”, “Esfahan” dhe objektin e pasurimit të uraniumit “Fordow”.

Në një fjalim drejtuar kombit nga Shtëpia e Bardhë, presidenti i SHBA-së, Donald Trump njoftoi se objektet kryesore të pasurimit bërthamor të Iranit u shkatërruan nga sulmet amerikane.