Kreu i PD-së, Lulzim Basha ka kujtuar 20-vjetorin e sulmit të 11 shtatorit, duke përkujtuar viktimat e terrorizmit dhe bashkuar solidaritetit me familjarët dhe kombin amerikan.
Në një postim në “Twitter”, Basha shkruan se sulmet e 11 shtatorit ishin sulme ndaj vlerave të lirirsë, demokracisë dhe bashkëjetesës.
“Dy dekada më parë, bota u trondit nga sulmet terroriste të 11 shtatorit jo thjesht ndaj SHBA, por ndaj vlerave të lirisë, demokracisë dhe bashkëjetesës. I bashkohemi përkujtimit të viktimave të terrorizmit, dhe solidaritetit me familjarët e tyre dhe kombin mik amerikan”.
Ai thekson aleancën me SHBA në luftën kundër terrorizmit dhe mbrojtjes së vlerave.
“Ne qëndrojmë në krah të partnerit strategjik të Shqipërisë në luftën kundër terrorizmit dhe mbrojtjes së vlerave, që na bashkojnë në aleancën dhe miqësinë e veçantë mes dy kombeve tona”, shkruan Basha.
Sulmet e 11 Shtatorit ishin një seri sulmesh të koordinuara terroriste, të udhëhequra nga grupimi terrorist AL Kaeda, kundrejt SHBA më 11 Shtator 2001. Objekte të sulmit ishin ndërtesa të rëndësishme në SHBA, si Kullat Binjake ku ishte vendosur Selia e ObT në Nju York, ndërtesa e Pentagonit si dhe Shtëpia e Bardhë.
Në sulmin e 11 shtatorit 2001 humbën jetën rreth 3 mijë persona. Viktimat në kullat binjake ishin 2 752, mes tyre 343 zjarrfikës dhe 60 policë.
Edhe ish-ministri i Jashtëm, deputeti i PD Tritan Shehu ka kujtuar sulmet e 11 shtatorit në SHBA, nga ku humbën jetën thuajse 3 000 persona.
Në një postim në Facebook, Shehu thekson se terrorizmi ende që vazhdon të kërcënojë botën mbarë, dhe sipas tij, 11 shtatori është sot, më shumë se asnjëherë aktual.
“11 Shtatori, dita që vazhdon të kërcënojë Botën mbarë!
Në atë mëngjes të asaj data u goditën ShBA- zemra e demokracisë, vlerave universale, lirive, garancia për ato për të gjithë njerëzimin”.
Ai nuk harron të përmendë pushtimin e Afganistanit nga talebanët, duke i konsideruar si një sinjal alarmi i vazhdimit të 11 shatorit.
“Ngjarjet e fundit në Afganistan me goditjen që mori Bota e Lire, Bota Jonë, jane një sinjal i fortë alarmi i vazhdimit të 11 Shtatorit, si kërcënim real. Pra 11 Shtatori nuk duhet harruar kurrë, ai është më shumë se asnjëherë aktual sot për të gjithë, si një dëshmi e tregues i atij rreziku, që vazhdon të jetë midis nesh”, shkruan Shehu.
