Patrulla e Policisë së Kosovës është sulmuar përsëri mëngjesin e sotëm me armë zjarri në fshatin Zupçe të Zubin Potokut. Sipas njoftimeve të policisë, patrulla është sulmuar me armë zjarri ku përveç dëmeve materiale në automjet nuk raportohet për zyrtarë të lënduar.
Ndërkohë ka reaguar drejtori i zyrës për Kosovën në qeverinë serbe, Petar Petkoviç. Petkoviç pretendon se sulmi i fundit “nuk ka të bëjë fare me serbët”.
“Ne e dënojmë fuqishëm sulmin ndaj automjetit të SHPK-së, si dhe çdo përpjekje të mëparshme për të rrezikuar paqen dhe stabilitetin. Ngritja e tensioneve në terren, veçanërisht në veri, nuk ka të bëjë fare me serbët”, ka shkruar Petkoviç në Twitter.
Përmendim që sulmi i sotëm ndaj Policisë së Kosovës është vazhdimësi e disa sulmeve të ndodhura ditëve të fundit në veri të vendit. Masat policore janë forcuar ku makinat me targa të Serbisë, pasi hyjnë në territorin e Kosovës, duhet të vendosin targa të përkohshme, në mënyrë të ngjashme siç kanë vepruar shoferët e makinave me targa të Kosovës kur kanë hyrë në Serbi.
Discussion about this post