Një ngjarje e rëndë është regjistruar në ishullin Rodos në Greqi, ku një punonjëse shtëpie është plagosur me thikë brenda banesës ku punonte. Viktima, 42 vjeçe, kujdesej për dy persona të paralizuar, kur në banesë hyri një e njohur e saj.
Sipas informacioneve, autorja 54-vjeçare, një emigrante shqiptare, e çoi gruan në kuzhinë pa ngritur dyshime dhe më pas e sulmoi papritur, duke e goditur katër herë me thikë. E plagosura ka marrë goditje në dorë, këmbë, kraharor dhe në anë të trupit.
Pas sulmit, 54-vjeçarja dyshohet se e mbylli viktimën në një dhomë, duke mos i lënë asnjë mundësi largimi.
E shpëtoi qetësia
Pavarësisht plagëve të rënda, 42-vjeçarja arriti të ruajë gjakftohtësinë dhe të njoftojë urgjencën. Ajo u transportua me ambulancë në spitalin e Rodosit, ku iu nënshtrua ndërhyrjes kirurgjikale dhe aktualisht ndodhet jashtë rrezikut për jetën.
Preu kabllot e kamerave
Para se të largohej nga banesa, autorja, me origjinë shqiptare, dyshohet se preu kabllot e sistemit të kamerave për të shmangur regjistrimin e sulmit.
Megjithatë, disa orë më vonë ajo u paraqit vetë në Komisariatin e Ialyssos, ku edhe u arrestua. Sipas autoriteteve, e dyshuara ka histori problemesh të shëndetit mendor dhe më parë ka qenë e shtruar në klinikë psikiatrike.
Ngjarja po hetohet si tentativë për vrasje, ndërsa hetimet janë marrë në dorë nga strukturat përkatëse të policisë në Rodos.
Autoritetet po punojnë për të zbardhur motivet e sulmit, ndërsa rasti ka shkaktuar shqetësim në komunitetin lokal.
E dyshuara kishte shprehur më parë qëllimin për t’i dhënë fund jetës dhe ishte shtruar në një klinikë psikiatrike.
Gjendja mendore e të akuzuarës, e kombinuar me njohjen që ajo dyshohet se ka pasur me viktimën, janë pika mbi të cilat oficerët kompetentë po përpiqen të hedhin dritë, me qëllim rindërtimin e saktë si të motiveve ashtu edhe të renditjes kronologjike të ngjarjeve.
gijotina.com/
Discussion about this post