Sulmi i skuadrës së Skënderbeut është në ditët më të errëta të viteve të fundit. Kjo ka ndikuar në klasifikimin e juglindorëve të cilët pozicionohen në vendin e fundit. Sulmuesi i kësaj skuadre, Mensah ka analizuar situatën e korçarëve dhe është besimplotë se sulmi do të zhbllokohet.
“Problemi i golave të shënuar është një shqetësim për të gjithë ekipin, jo vetëm për ne sulmuesit. Gjë që është parë edhe në ndeshjet e fundit te të cilat kemi humbur pa shënuar asnjëherë në portën e kundërshtarit. Pas ndeshjes me Kastriotin, ku nuk bëmë paraqitje të mirë, u kthyem në një lojë të mirë me Dinamon, por fati nuk ishte në anën tonë.
Gjithsesi, jam i bindur se nëse tregojmë atë futboll që bëmë në ndeshjen e fundit, jemi në rrugën e duhur. Për sa i përket golave të sulmuesve, ne kemi element cilësorë në ekip dhe jam i sigurt se shumë shpejt do të zhbllokohemi dhe do ta kalojmë këtë ngërç”, theksoi Mensah.
