Një efektiv policie në Shkodër është plagosur me sende të forta këtë të hënë, në një sherr ku janë shënuar edhe të shtëna me armë.
Efektivi i lënduar është Admir Okaj, 47 vjeç. Sipas një rindërtimi paraprak të ngjarjes nga blutë e Shkodrës, ora shënonte rreth 15:45 kur ndodhi sherri mes Okajt dhe 47-vjeçarit Ormir Gucia. Admir Okaj ishte jashtë shërbimit kur u godit me sende të forta në afërsi të banesës, në zonën e Zdrales.
“Dyshohet se gjatë një konflikti të çastit, për motive të dobëta, shtetasi O.G., 47 vjeç, ka dëmtuar në kokë, me sende të forta, shtetasin Admir Okaj, 49 vjeç, banues në Shkodër (punonjës policie, jashtë shërbimit), i cili po merr mjekim në spitalin rajonal të Shkodrës dhe është jashtë rrezikut për jetën”, njoftoi policia.
Të shtënat
Gjatë konfliktit ka pasur edhe të shtëna me armë.
Sipas versionit zyrtar të policisë së Shkodrës, arma e policit jashtë shërbimit dyshohet se është shkrepur në mënyrë të pavullnetshme. Megjithatë, ky version i hetimeve është paraprak. Nga qitja e armës nuk ka të lënduar.
Ndërkohë, personi tjetër që është konfliktuar me policin, është shpallur në kërkim.
“Gjatë konfliktit dyshohet se arma e shërbimit e punonjësit të Policisë është shkrepur në mënyrë të pavullnetshme, por pa shkaktuar dëmtime. Shërbimet e Policisë, me marrjen e njoftimit, shkuan menjëherë në vendin e ngjarjes dhe vijojnë krehjen e zonës, për kapjen e 47-vjeçarit. Grupi hetimor, në drejtimin e Prokurorisë, vijon punën për sqarimin e plotë të rrethanave të ngjarjes”, njofton policia.
Blutë sqarojnë në lidhje me këtë ngjarje, po kryen veprime edhe Agjencia e Mbikëqyrjes Policore “për të zbardhur rrethanat e përdorimit ose jo të armës së zjarrit, si dhe për të përcaktuar nëse shkrepja e armës ka qenë e pavullnetshme”.
Lexo edhe:
Discussion about this post