Bylis i ka dhënë fund serisë së humbjeve radhazi. Ballshiotët u rikthyen te fitorja, duke mposhtur pastër Teutën, me rezultatin 4-0, në ndeshjen e vlefshme për javën e 10-të në Superiore. Një takim i dominuar totalisht nga skuadra e Nevil Dedes, që ishte e papërmbajtshme nga fillimi. Abazaj zhbllokoi takimin në minutën e 4-t pas një penalltie, ndërsa Berko dyfishoi shifrat në minutën e 21-të.
Edhe fraksioni i dytë nuk kishte shumë histori, me Bylisin që shënoi edhe dy herë të tjera, me Rucin në minutën e 66-të dhe Gjatën në minutën e 86-të. Me këtë fitore, ballshiotët i largohen fundit dhe mbajnë vendin e nëntë me 8 pikë, ndërsa Teuta renditet në vendin e gjashtë me 14 pikë.
Nuk prodhoi fitues sfida mes Egnatias dhe Dinamos, e cila u mbyll në barazim 1-1. Në Rrogozhinë ishte një ndeshje spektakolare dhe e luftuar nga të dyja ekipet, që në fund ishin të detyruara të ndanin pikët. Ndeshja e vlefshme për javën e 10-të në Superiore, u vendos nga dy penallti. Në minutën e 19-të, Lushkja u tregua i saktë nga pika e bardhë, duke i dhënë avantazhin Egnatia.
Megjithatë, ishte një tjetër 11 metërsh që vendosi baraspeshën, me Bregun, që shënoi për Dinamon. Rezultat nuk ndryshoi në pjesën e dytë, ndonëse rrogozhinasit luajtën me 10 lojtarë nga minuta e 53-të, pasi Aleksi u ndëshkua me karton të kuq. Me këtë barazim, Egnatia mban vendin e dytë në renditje me 16 pikë, po aq sa Partizani kryesues dhe Dinamo e vendit të tretë.
Discussion about this post