E shtuna rikthen fazën e tretë të Abissnet Superiore dhe në program ka ndeshje mjaft interesante. Sigurisht Teuta-Partizani është një prej atyre që do të ofrojë më shumë luftë sportive, edhe pse ecuria e këtyre skuadrave nuk ka qenë ajo që pritej.
Normalisht Tirana e vendit të parë do të marrë vëmendje, edhe pse luan kundër Skënderbeu që synon të qëndrojë në elitën e futbollit shqiptar. Po të shtunën në program është edhe një ndeshje tjetër, madje ajo që e hap javën: Kastrioti-Dinamo.
Kjo ndeshje nis në orën 13:45, kurse dy të tjerat tre orë më pas. E diela sjell duele të tjera mjaft interesante. Laçi-Vllaznia mund të konsiderohet kryendeshja e kësaj jave, me bardhezinjtë që në fazën e dytë janë mposhtur vetëm nga shkodranët dhe tani janë në vendin e dytë, me 4 pikë më shumë se ekipi i Brdaric.
Ky takim luhet nga ora 13:45, njëkohësisht me një tjetër ndeshje të rëndësishme të kësaj jave, mes Egnatias dhe Kukësit. Rrogozhinasit kanë treguar se mund t’i hapin punë çdo ekip dhe duan fitoren e parë për këtë vit, ndaj një Kukësi me kualitete që i rëndon humbje e fundit ndaj Tiranës.
Discussion about this post