Superliga shqiptare mbylli javën e 19-të, teksa këtë të hënë u zhvilluan tre duele. Në 13:00 Laçi fitoi 4-3 në shtëpi kundër Teutës. Kurbinasit ia dolën të marrin tri pikë me permbysje spektakolare. Në 19:00 u zhvilluan dy duele të tjera. Erzeni fitoi 3-2 me Vllazninë në “Niko Dovana”, teksa Partizani barazoi 1-1 me Egnatian. Pas javës së 19-të, Superliga shqiptare kryesohet nga Tirana me 34 pikë, ndjekur nga Partizani me 31, Erzeni me 29 dhe Vllaznia me 28. Kukësi, Teuta dhe Kastrioti janë në zonën e ftohtë.
Në stadiumin e Laçit, vendasit fituan 4-3 me Teutën.
Spektakolare sfida, me kurbinasit që përmbysën duelin. Lorenco Vila dhe Sherif Kallaku (11 metërsh) kaluan Teutën në avantazhin e dyfishtë në minutat 12 dhe 16, teksa Laçi barazoi me Adeleke dhe Babatunde në minutat 22 dhe 24. Pjesa e dytë vijoi me diktatin e vendasve, teksa Serxho Ujka dhe Adeleke sërish shënuan edhe dy herë të tjera (68′, 74′). Në minutën e 90 kishte vend edhe për golin e Ildi Grudës te Teuta, për të dërguar ndeshjen në rezultatin final 4-3. Laçi me 26 pikë qëndron në vendin e gjashtë momentalisht, teksa Teuta me 21 pikë pozicionohet në vendin e nëntë.
Erzeni fitoi 3-2 me Vllazninë për javën e 19-të të Superligës.
Shijakasit në “Niko Dovana” treguan se nuk janë më surprizë, duke kaluar shkodranët në renditje. Njësoj si në fazën e parë, Erzeni duket se ia ka marrë dorën Vllaznisë duke e mundur sërish. Në pjesën e parë Erzeni shënoi me autogolin e Smajlit dhe Nonaton. Në minutën e 57 Mala rihapi ndeshjen, teksa sërish Nonato shënoi për 3-1 dhe dopietën personale. Goli i Jonuzit në minutën e 81 shërbeu në fund sa për statistika, me ndeshjen që u mbyll 3-2. Erzeni me 29 pikë merr vendin e tretë, teksa Vllaznia me 28 qëndron e katërta.
Discussion about this post