Pas përfundimit të ndeshjes midis Partizanit e Teutës që u mbyll me shifrat 2-1 të premten dhe që solli dorëheqjen e trajnerit të durrsakëve, Edi Martinit, ditën e sotme do të vijohet me dy takime të tjera të Superligës.
Në orën 16:45 Skënderbeu do të presë në Korçë skuadrën e Tiranës për takimin e javës së 10 të kampionatit. ‘Bardheblutë’ e kryeqytetit vijnë në këtë sfidë në transfertë pas dy humbjesh radhazi një në Kupën e Shqipërisë kundër Dinamos, ku edhe u skualifikuan dhe e fundit në Superiore kundër Kukësit, ndaj i vetmi rezultat që mund të pranohet në këtë sfidë është fitorja.
Skënderbeu nga ana tjetër është duke treguar pak forcë dhe duke e marrë veten nga ndeshjet e javëve të para, ndaj edhe sot pritet të tentojë të marrë pikë.
Ndërsa në orën 19:45 Vllaznia do të presë Laçin në ‘Loro Boriçi’. Shkodranët vijnë në këtë përballje pas rezultateve pozitive dhe e motivuar për një tjetër fitore, teksa Laçi barazoi në takimin e fundit ndaj Partizanit, ndaj sot do përpiqet me gjithçka për tre pikët.
Dy ndeshjet e fundit për javën e 10 të Superligës janë midis Dinamo dhe Kastriotit që do të zhvillohet në orën 13:45 të dielën dhe Kukësi-Egnatia që do të përballen po në të njëjtën orë e në të njëjtën ditë./K.T/Gijotina.com
Discussion about this post