Ministri i Punëve të Brendshme, Xhelal Sveçla në një konferencë të jashtëzakonshme lidhur me rastin e mbrëmshëm në Zveçan, ku policia ka identifikuar dhe, njëherësh, konfiskuar një veturë me targa serbe, në të cilën janë zbuluar një sasi armatimi e mjete të ndryshme ushtarake, ka thënë se situata ka degraduar në kulm pas agresionit të Serbisë me ç’rast ka rrëmbyer 3 policë, më 14 maj, të cilët kanë qenë në krye të detyrës, njofton RTK.
“Duke marrë shkas nga këto akte kundër ligjit ne kemi intensifikuar punën për të siguruar qetësi dhe ambient të sigurt për të gjithë qytetarët, që të parandalohen tentativat për eskalim të situatës dhe cenim të rendit, të sigurisë e të sovranitetit të vendit dhe janë realizuar arrestime të shumta duke vënën në pranga kriminelë të cilët në të kaluarën për vepra të ngjashme janë toleruar e janë amnistuar. Të njëjtit kanë sulmuar gazetarët e pjesëtarë të KFOR-it e me vite kanë kërcënuar e shantazhuar qytetarët tanë e veçanërisht komuniteti serb”, deklaroi Sveçla.
Sundimi i ligjit për ne është prioritet
Ministri Sveçla tha se sundimi i ligjit për ne është prioritet, mbi bazën e të cilit po veprohet, duke shtuar se sovraniteti i Republikës së Kosovës është i paprekshëm.
“Andaj të gjitha këto veprime policore që po ndodhin, arrestimet të cilat po bëhen, dëshmojnë se ne nuk mund të zbrapsemi ndaj kriminelëve dhe qëndrojmë të angazhuar për zbardhjen e të gjitha sulmeve dhe ruajtjen e të gjithë qytetarëve pa dallim”, derisa shtoi se nuk do të ndalet përkushtimi i përbashkët për ligjshmëri, kushtetutshmëri e legalitet në çdo cep të vendit”, theksoi ministri Sveçla, duke vënë në pah aksionin e djeshëm në Zveçan, ku, sipas tij, Policia e Kosovës, AKI ka bërë të mundur shmangien e një sulmi të planifikuar terrorist ndaj Republikës së Kosovës.
Ndryshe mbrëmë është zbuluar një makinë me targa të Beogradit, në të cilin janë zbuluar sasi të mëdha të armatimit, mjeteve eksplozive dhe të municioneve të ndryshme luftarake.
Ministri Sveçla bëri të ditur se në kuadër të këtij arsenali të armatimit ka shenja që ndërlidhen me, siç tha ai, grupe ilegale si: ‘Brigada e Veriut’, shenja dalluese të njësiteve ruse, radiolidhje të ngjashme me ato të konfiskuara në zyrën e Aleksandar Filipoviqit, (ish-shef i njësisë së Operativit në Drejtorinë rajonale të veriut, i shpërblyer nga presidenti i Serbisë, Aleksandar Vuçiq), në Leposaviq.
“E gjithë kjo është një dëshmi e radhës që vërteton se Aleksandar Vuçiq, përmes grupeve e organizimeve të tilla synon të destabilizojë vendin tonë”, deklaroi Sveçla, ndërsa shtoi se kontingjenti i armëve të kontrabanduara është më i madh se kaq, duke argumentuar më tutje se vetura me armatim është pronë e një ndërmarrjeje publike shtetërore të Serbisë, Shoqëria Aksionare e Hekurudhave të Serbisë.
Organizatat “Mbrojtja Civile” e “Severna Brigada” të shpallen organizata terroriste
Më tej, ministri Sveçla bëri të ditur se në ditët në vijim nga Qeveria e Kosovës do të kërkojë që organizatat si: “Mbrojtja Civile” e “Severna Brigada” të shpallen organizata terroriste, me çka lufta ndaj këtyre organizatave do të jetë edhe më efikase.
Discussion about this post