Policia e Vlorës ka vendosur në pranga 3 persona pas një operacioni policor anti-drogë. Në kuadër të operacionit policior ‘Tabacchino’ uniformat blu kanë goditur dy raste të shpërndarjes dhe trafikimit të paligjshëm. Janë vendosur në pranga D. B., 40 vjeç, K. V., 44 vjeç dhe A. T., 39 vjeç, të tre banues në Vlorë.
Nga askioni janë sekuestruar dhjetëra doza kokaine, kanabisi dhe paketa cigaresh pa pullë fiskale. Personat e arrestuar kishin përshtatur ambientet e ‘Tabacchino-ve’ për të kryer aktivitetin e paligjshëm.
“Seksioni për Hetimin e Narkotikëve në Drejtorinë Vendore të Policisë Vlorë, në vijim të punës për evidentimin dhe goditjen e veprimtarive kriminale në fushën e narkotikëve dhe tregtisë së paligjshme të mallrave të dyshuara si të kontrabanduara, organizoi dhe finalizoi operacionin policor të koduar “Tabacchino”, në kuadër të të cilit u arrestuan në flagrancë shtetasit: D. B., 40 vjeç, K. V., 44 vjeç dhe A. T., 39 vjeç, të tre banues në Vlorë”, njoftoi policia.
“Arrestimi i tyre u bë pasi, gjatë kontrollit në dy subjekte tregtare të llojit tabakino, në qytetin e Vlorës, njëri në përdorim nga shtetasi D. B. dhe tjetri në përdorim nga shtetasit K. V. dhe A. T, shërbimet e Policisë gjetën dhe sekuestruan, në cilësinë e provës materiale, dhjetëra doza me lëndë narkotike të dyshuara si kokainë dhe kanabis, si dhe një sasi paketash cigaresh pa pullën fiskale të Ministrisë së Financave, të dyshuara si të kontrabanduara”, shtuan të njëjtat burime.
Discussion about this post