Deputetja e Partisë Demokratike, Jorida Tabaku, mori pjesë në konferencën ndërkombëtare “Countering Authoritarian Influence”, të organizuar nga International Republican Institute (IRI), ku u mblodhën politikanë, ekspertë të sigurisë dhe përfaqësues nga vendet e rajonit.
Gjatë fjalës së saj, Tabaku u ndal te mënyra se si demokracitë mund të forcojnë rezistencën ndaj ndikimeve autoritare dhe ndërhyrjeve të huaja, duke theksuar se cenueshmëria fillon nga dobësitë e brendshme të shtetit.
“Nuk janë vetëm aktorët e jashtëm problemi. Ndërhyrja e huaj funksionon vetëm aty ku institucionet janë të dobëta, ku korrupsioni tolerohet, ku mungon transparenca dhe ku qytetarët humbasin besimin tek shteti,” u shpreh Tabaku.
Duke iu referuar zhvillimeve në Shqipëri dhe në Ballkanin Perëndimor, deputetja demokrate tha se korrupsioni, pastrimi i parave, krimi i organizuar dhe kapja e shtetit nuk përbëjnë më vetëm sfida të qeverisjes së mirë, por janë kthyer në rreziqe të drejtpërdrejta për sigurinë kombëtare.
Sipas saj, ekonomitë e hapura duhet të shoqërohen me mekanizma mbrojtës për të shmangur krijimin e varësive strategjike.
“Siguria ekonomike është siguri kombëtare. Siguria energjetike është siguri kombëtare. Siguria teknologjike është siguri kombëtare. Po kështu edhe transparenca financiare,” theksoi Tabaku, duke nënvizuar se demokracitë duhet të ndërtojnë mekanizma që parandalojnë krijimin e varësive strategjike.
Në fjalën e saj, Tabaku prezantoi edhe dy nisma që ka mbështetur në Kuvend. Njëra prej tyre lidhet me krijimin e një kuadri modern për shqyrtimin e investimeve të huaja strategjike (FDI Screening), që do t’i mundësonte Shqipërisë të kontrollojë investimet në sektorë të ndjeshëm si infrastruktura, energjia, telekomunikacioni, portet, të dhënat dhe teknologjitë strategjike.
Sipas saj, ky mekanizëm nuk synon të kufizojë investimet e huaja, por të garantojë që hapja ekonomike të mos kthehet në një rrezik për interesat strategjike të vendit.
Tabaku foli gjithashtu për paketën e propozuar prej saj kundër korrupsionit dhe pastrimit të parave, e cila parashikon më shumë transparencë mbi pronësinë përfituese të kompanive, kontroll më të rreptë të transaksioneve financiare me vlerë të lartë, rritje të transparencës në prokurimet publike dhe masa për të penguar hyrjen e kapitaleve të paligjshme në sektorët strategjikë të ekonomisë.
Një pjesë e fjalës iu kushtua edhe rolit të teknologjisë në sfidat gjeopolitike. Sipas Tabakut, inteligjenca artificiale, infrastruktura digjitale, të dhënat dhe teknologjitë e avancuara janë tashmë elementë kyç të fuqisë kombëtare, ndaj Shqipëria duhet të investojë në institucione që tërheqin investime të besueshme dhe mbështesin inovacionin.
Në përfundim, deputetja u bëri thirrje partnerëve ndërkombëtarë që vendet e Ballkanit Perëndimor të vlerësohen mbi bazën e zbatimit të reformave dhe jo të premtimeve politike. Ajo kërkoi gjithashtu që lufta kundër pastrimit të parave, transparenca e pronësisë përfituese dhe kontrolli i investimeve strategjike të trajtohen si instrumente për mbrojtjen e sovranitetit të vendeve të rajonit.
“Ndërhyrja e huaj tërhiqet nga dobësia. Përgjigjja më e fortë që mund të japë një demokraci është ndërtimi i rezistencës përmes transparencës, shtetit të së drejtës, llogaridhënies dhe besimit të qytetarëve tek institucionet”, përfundoi Tabaku.
Discussion about this post