Nënkryetarja e Partisë Demokratike, Jorida Tabaku u shpreh se janë demokratët të cilët kanë sakrifikuar për këtë parti dhe janë po ata që do të punojnë për rikthimin e shpresës tek të rinjtë që largohen masivisht dhe tek ata qytetarë që kanë humbur shpresën tek politika, për shkak të qeverisjes së kalbur.
“Ne, duam të godasim në zemër korrupsionin dhe kapjen e lirisë së tregut dhe individëve nga baronët hajdutë që sot qeverisin vendin. Sot Shqipëria dhe shqiptarët kanë përballë një qeverisje të kalbur dhe të korruptuar që i mban peng në burgun e tranzicionit. Shqiptarët kanë përballë një armatë hajdutësh dhe të korruptuarish që i përdorin zyrat e qeverisjes për të privuar të rinjtë dhe të rejat nga liria e tyre. Prandaj ne duhet të jemi krahu, shtegu dhe udha nga e cila Shqipëria të kalojë nga burgu i tranzicionit në lirinë e një Shqipërie Europiane. Jemi ngritur mbi parimin e një demokracie funksionale që ecën mbi institucionet e lira dhe ndarjet e pushteteve.”
Nënkryetarja e PD-së nënvizoi se kjo forcë politike do të luftojë për të luftojë për t’i kthyer vendit ndarjen e pushteteve duke luftuar krimin e organizuar dhe vendosjen e sundimit të ligjit mbi këdo.
“Ndaj do të luftojmë për t’i rikthyer këtij vendi ndarjet e pushteteve, kufizimin e mandateve dhe mbi të gjitha shkëputjen e krimit të organizuar nga politika dhe qeverisja. Një forcë politike që sot lufton për një shtet të së drejtës, për sundimin e ligjit më shumë se sa për sundimin e një individi apo një bande oligarkësh. Ne jemi shpresa e të ardhmes sepse do të luftojmë për një ekonomi dhe Shqipëri të mundësive për të gjithë, të meritokracisë.”
Tabaku theksoi se parimet e shtetit të së drejtës së pari i duhen ofruar demokratëve, duke bërë që PD-ja të jetë sa më pranë shembujve që dëshmojnë meritokracinë. Ajo shtoi gjithashtu se beson tek ndyrshimet e mëdha, të cilat do t’i ofrojnë Shqipërisë e shqiptarëve një parti të re moderne dhe dixhitale, ndryshe nga shpikjet fiskale të partisë në pushtet, të cilat sipas saj nuk i shërbejnë rimëkëmbjes ekonomike të vendit.
“Po që këto parime t’ia japim shqiptarëve së pari duhet t’ia japim demokratëve. Do të këmbëngulim që kjo forcë politike t’i afrohet përherë e më shumë meritokracisë brenda saj për të dhënë ne shembullin e parë se si do të veprojmë në qeverisje. Ne besojmë se shtresa e mesme është pjesa më vitale e një shoqërie dhe ajo që mundëson avancimin e saj. Ne besojmë dhe jemi të bindur që mbështetja e kësaj shtrese jo me shpikje fiskale siç bën kjo qeveri por me politika reale në favor të saj është lojtari kyç që mund ta kthejë për mirë ekonominë tonë. Ne besojmë tek dija e vendosur në praktikë nga kjo shtresë. Besojmë tek forca e njeriut për të mundësuar ndryshime të mëdha. Prandaj sot jemi këtu për t’i ofruar Shqipërisë dhe shqiptarëve një parti më moderne, më të re, më dixhitale dhe më pranë jush”, tha Tabaku.
Discussion about this post