Tabaku tek “Ekonomia”: 2 mld euro nga buxheti për PPP-të dhe koncesionet

Nënkryetarja e Partisë Demokratike, Jorida Tabaku pohoi në Komisionin e Ekonomisë dhe Financave se projekt Buxheti për vitin 2022 nuk ka të pasqyruar shqetësimin që kjo maxhorancë deklaroi pak javë më parë që ka lidhje me krizën e energjisë elektrike.

Tabaku u shpreh se qeveria nuk është treguar e përgjegjshme sidomos në fushën e Detyrimeve të Prapambetura të cilat shkojnë në vlerën e 1 miliard lekëve.

“Shpenzimet e vitit 2022 do të jenë më shumë se sa 27% e PBB që është vlera më e lartë në mbi 20 vite. Por kjo rritje do të shkojë për PPP-të të cilat do t’i kushtojnë buxhetit thuajse 2 mld euro. Shpenzimet kapitale janë 58 mln euro dhe këtu nuk është përfshirë rindërtimi dhe kanë një rënie me 10% në raport me vitin 2021”, tha ajo.

Tabaku shtoi se buxheti i shtetit është i dedikuar për shpenzimet e PPP-ve, ndërsa rreshtoi disa prej koncesioneve dhe PPP-ve, ku përmendej rruga Milot-Fier, kolaudimi i automjeteve, apo dhe triporti i Vlorës.

“1.Rruga Milot-Fier (pjesë e autostradës Adriatiko Joniane që në vendet e tjera financohet nga BE dhe në Shqipëri nga buxheti) 178 mld lekë (1.4 mld Euro)
Kosto e kësaj rruge është 18 mln euro/km ndërkohë që mesatarja e vendeve të BE është 9.3 mln euro/km (burimi Eurostat). Rruga në fjalë do jetë e gjatë 115 km dhe ka 62 km ekzistuese dhe vetëm 53 km që do të ndërtohen rishtazi. Tani si ka mundësi që kjo rrugë që jepet me PPP ka një kosto që është 2 fish më e lartë se sa kostot e ndërtimit të rrugëve në BE?

2.Kolaudimi i Automjeteve (rishpallje) me vlerë 20.2 mld lekë (163 mln Euro)
3.Triport Vlorë me vlerë 5.6 mld lekë (45.6 mln Euro)
4.Siguria rrugore me vlerë 5 mld lekë (45 mln Euro)
5.Infrastruktura brenda qytetit të Elbasanit 882 mln lekë (6.7 mln euro)
6.Shërbimi i infrastrukturës së çelësave publikë që kanë lidhje me PPP të Fiskalizimit me vlerë 208 mln lekë (1.69 mln euro).

7.Ndërtimi dhe operimi i aeroportit të Sarandës me vlerë 4.2 mld lekë (34.2 mln euro)”, tha ajo.

Sipas Tabakut, FMN i kërkon qeverisë që të menaxhojë më mirë shpenzimet dhe të mos rrisë shpenzimet për PPP-të.