Kryeministri Edi Rama ka zhvilluar sot një takim me nxënës dhe studentë, për të diskutuar për Strategjinë e Re Kombëtare për Rininë. Gjatë këtij takimit të rinjtë nuk i kanë kursyer ankesat dhe kërkesat që kanë për qeverinë. Një prej tyre tha se, në shkolla mungojnë laboratorë dhe ambiente për të kryer orët e praktikës dhe se në shumë shkolla lënda e infromatikës bëhet nga telefoni.
Vetë kryeministri e ritheksoi këtë problematike dhe tha se kjo është një ndër arsyet që nuk kemi arsim në cilësinë e duhur. Ndërkaq, ai tha se do diskutohet që në hartimin e projektit për buxhetin e ardhshëm të futen në listë dhe laboratorët për çdo shkollë.
“Po jua them këtë se shqetësimet e këtyre takimeve janë diskutuar me anëtarët e kabinetit për tu përfshirë në projekt buxhetin e vitit të ardhshëm.
Një nga çështjet që u prek dhe këtu është cilësia e ulët e mësimit të informatikës, pasi klasat e informatikës janë të një cilësie të ulët, ku nuk duhet të mësohet mekanikisht dhe teorikisht, por praktikisht. Një temë tjetër që u diskutua është cilësia e mësimit në laboratorë, pasi laboratorët nuk janë të pasur dhe nxënësit ankohen për një mësim jo motivues në laboratore që mund t’i nxisë ata të mësojnë më shumë. Sot ne vendosëm që në buxhetin e vitit të ardhshëm të adresojmë çështjen e mësimit në laborator dhe mësimin e informatikës.
Ne do fillojmë punën për të plotësuar laboratorët e shkollave, me qëllimin që plotësimi i laboratorëve mos të jetë një objektiv afatgjatë, por një objektiv afatshkurtër, ashtu edhe për mësimin e informatikës”, tha Rama.
Sakaq, vetë kryeministri e pranoi se në Shqipëri nuk kemi mësim fortë cilësor, ndërsa theksoi se për këtë duhet që edhe mësuesit të punojnë më shumë dhe prindërit të mbajnë fëmijët larg telefonave dhe më pranë shkollave.
