Autoriteti i Kombinuar i Tees Valley (TVCA) i ka dhënë dy ditë kohë kryebashkiakut të tij Ben Houchen, për të deklaruar udhëtimin e bërë në Shqipëri, shkruan media e huaj “Yorkshire Post”.
Kryebashkiaku konservator Lord Houchen bëri një udhëtim pune në Shqipëri në qershor 2022, të cilin deklaroi se e kishte paguar Aeroporti Ndërkombëtar i Tiranës. Mirëpo, pas publikimit të këtij lajmi nga mediet angelze si dhe ato shqiptare, TIA hodhi poshtë këto deklarata duke bërë me dije se nuk kanë paguar për vizitën e Houchen dhe delegacionit të tij.
Sipas kushtetutës së Tees Valley, të gjithë zyrtarët dhe anëtarët duhet të deklarojnë çdo ofertë dhuratash ose mikpritjeje, pavarësisht nëse ato pranohen apo jo.
Më 14 qershor të vitit të kaluar, kryebashkiaku Ben Houchen vizitoi Shqipërinë. Ai u takua me kryeministrin Edi Rama ku aso kohe u tha se në fokus të diskutimeve gjatë këtij takimi kanë qenë investimet e ndërsjellta mes Shqipërisë dhe rajonit të Luginës së Tees.
Ndërkohë, tre ditë më vonë Houchen u prit në zyrë nga kryebashkiaku Erion Veliaj, ku u diskutua për projektet koncesionare, ndërsa kryebashkiaku britanik ka vizituar edhe disa kantiere, të cilat deri më sot nuk janë bërë me dije se cilat kanë qenë.
Pas këtij takimi media angleze tha se vizita gjatë së cilës Houchen u takua me kryeministrin Edi Rama dhe kryetarin e Bashkisë së Tiranës, Erion Veliaj, është paguar nga “Tirana International Airport”. Por menjëherë pas publikimit të këtij artikulli, Aeroporti i Tiranës mohoi se ka paguar për vizitën e kryebashkiakut britanik.
Pas këtyre deklaratave të njëpasnjëshme në Britani deputeti i Liberal Demokratëve Lord Scriven i cili është nënkryetar i Shoqatës së Qeverisjes Lokale dhe një ish-udhëheqës i Këshillit të Sheffield i shkroi Autoritetit të Tees Valley për të bërë një ankesë zyrtare për atë që ai e shihte si ” shkelje e qartë” e rregullave të vetë Autoritetit, pasi kryebashkiaku nuk e kishte deklaruar këtë udhëtim të bërë.
Vetë Këshilli i Luginës së Tees u mbrojt duke deklaruar se Houchen nuk ka asnjë detyrim për të raportuar vizitën, pasi shifra për shpenzimet totale të tij ishte 1455.76 paund, ndërsa pragu për deklarimin e vizitave jashtë shtetit sipas ligjit britanik është 1500 paund. Por, në Britani çështja është kthyer tashmë në një skandal të madh ku u përfshi edhe Parlamenti.
Disa javë më parë qeveria britanike nisi hetimet për shitjen e 500 mijë tonëve skrap, sipas një marrëveshje që kryebashkiaku Houchen ka bërë me dy biznesmenë britanikë, Martin Corney dhe Chris Musgrave. Sipas laburistëve marrëveshjet i kanë shkaktuar miliona paund dëm qytetarëve britanikë.
Operacioni i shkrirjes së skrapit në terren drejtohet nga dhëndri i shqiptar i Corneyt, që quhet Orion Kotrri. Mediat britanike rapoartuan se Corney dhe Kotrri kanë qenë pjesë e delegacionit të kryebashkiakut gjatë vizitës së tij në Tiranë, duke hedhur kështu dyshime se dhëndri i oligarkut britanik mund të ketë qenë pika e kontaktit e takimeve që Lord Houchen zhvilloi në Shqipëri me qeveritarët e vendit tonë.
Lidhjet e kryebashkiakut britanik me shqiptarët kanë nisur të publikohen gjerësisht në mediat britanike. Madje ato janë bërë objekt debatesh dhe akuzash për korrupsion në Parlamentin Britanik.
Discussion about this post