Kryeministri Edi Rama e ka krahasuar Shqipërinë me një zonjë që duhet mbrojtur nga Policia e Shtetit.
Në një takim me ministrin e Brendshëm Bledi Çuçi dhe drejtuesit e unifomave blu, Rama citoi vargjet e Vaso Pashës në poezinë “O MOJ SHQYPNI”, ku shqipëria krahasohet me trupin e një zonjë të bukur. Mirëpo teksa thoshte këto fjalë, Rama ngatërroi një varg.
Në vend që të thoshte “Burrat e dheut të thirrshin nanë”, kreu i qeverisë tha “burrat e dheut e thërrisnin zonjë”.
Fjala e Ramës:
Nuk duhen shumë, mjaftojnë shumë pak individë që flasin përçart për të degraduar imazhin e të gjithëve. Nuk janë të gjithë punonjësit e Shqiponjave, nuk janë të gjithë Punonjësit e Patrullave apo Rrugores që ndalojnë njerëzit në rrugë për lekë. Janë shumë pak por janë mjaftueshëm për të degjeneruar imazhin e të gjithë atyre bashkë. Prioriteti i dytë i policisë së Shtetit është kontrolli i territorit për mbrojtjen e pronës publike dhe mjedisit. Nuk mundet dot të zhvillojmë veprimtari të paligjshme mbi trupin e Shqipërisë. Policia e Shtetit është gardiane për pacënueshmërinë e trupit të këtij vendi që siç thotë Vaso Pasha, “burrat e dheut e thërrisnin zonjë”. E pra këtë zonjë duhet ta mbrojë Policia e Shtetit nga çdo cënim i hireve e bukurive të saj, nga çdo puçër me qelb që ia nxjerrin në trup abuzuesit në bashkëpunim me Policinë e Shtetit.
