Takimi Nano-Berisha në Vjenë, Fevziu zbulon detaje: Bënë gallatë 15 minuta dhe…

Duke folur në emisionin “Të Paekspozuarit”, gazetari i njohur Blendi Fevziu ka rrëfyer detaje nga takimi Nano – Berisha në Vjenë në vitin 2010. Në këtë takim ku edhe Fevziu ka qenë i pranishëm ai tregon se qenë personi që lajmëroi, Fatos Nanon për të vinte të takonte Berishën. Fevziu deklaroi se biseda e zhvilluar mes Nanos dhe Berishës, fillimisht nisi me 15 minuta gallatë midis tyre ndërsa më pas nisën të flasin për integrimin e Shqipërisë.

Pjesë nga biseda:

Fevzi, dikur ke pasur një marrëdhënie të afërt me Sali Berishën. Je krenar për këtë gjë apo pendohesh?

Blendi Fevziu: Absolutisht pjesa e miqësisë që kam pasur, që kam pasur frekuentim, ka qenë nga momentet shumë interesante të jetës time.

E vazhdon këtë raport?

Blendi Fevziu: Kam raport po. Jo me të njëjtin intensitet si atëherë. Sali Berisha në raportet private është nga njerëzit më interesantë që unë kam njohur në jetën time, në analizat që bën, për të folur për politikën, për ngjarjet, për histori. Është nga njerëzit më interesantë. Po kështu, një ulje dhe një bisedë me Edi Ramën është shumë interesante. Edhe me Fatos Nanon bisedat kanë qenë të jashtëzakonshme.

Më ka qëlluar njëherë, një nga bisedat më të bukura që kam parë në jetën time. Kthehesha nga Brukseli, Sali Berisha ishte kryeministër, mbërritëm në Vjenë. Në Vjenë ishte Nano. Unë e telefonova dhe Nano erdhi të takohej me Berishën.

Me përjashtim të një 15 minutëshi që bënë atë gallatën e zakonshme, qe një moment dhe këtë nuk e kam thënë asnjëherë, filluan të flasin për punën e integrimit të Shqipërisë. Në vitin 2010. Nano ishte akoma herët, sapo kishte ikur, kishte një 5 vjeçar. Flisnin për personazhet, problemet, defektet. Biseda aty, ishte një nga diskutimet më të jashtëzakonshme që kam parë në jetën time. Dy njerëz me një reflektim spektakolar, për të parë ku janë pikat e dobëta të vendit. Nuk po flisnin për vota, se kur vjen puna te vota ata transformohen. Por, biseda që ka zgjatur rreth 2 orë, një nga gjërat më interesante që kam dëgjuar.

Aty kam kuptuar që këta janë njerëz që thellë thellë, e njohin aq mirë politikën dhe vendin e tyre…