Të dhënat e Censit të publikuara këtë të premte nga INSTAT tregojnë një tkurrje të popullsisë që jeton në vend me më shumë se 400 000 banorë, gjatë dekadës.
Sipas INSTAT, Shqipëria ka 2 milionë e 412 mijë e 113 banorë. Drejtoresha e INSTAT Elsa Dhuli tha se Censi është një fotografi e çastit që i referohet datës 17 tetor 2023. “Ky cens, vlerësoi në territorin shqiptar në datë 18 shtator 2023, 2 412 113 banorë, të cilët përbëjnë 755 950 familje, me madhësi mesatare 3.2 anëtarë për familje, të cilët jetojnë në 1 082 529 banesa të zakonshme”, deklaroi ajo në një konferencë për mediat.
Referuar censit të fundit të publikuar në vitin 2011, numri i banorëve në vend ishte 2 milionë e 831 mijë e 741 banorë.
Sot, vendi numëron 419 628 banorë më pak se 13 vite më parë, referuar të dhënave nga INSTAT, të të dy Censeve.
Raportet periodike të INSTAT, por edhe të institucioneve të tjera ndërkombëtare kanë dëshmuar herë pas herë shifrat në rritje të personave që largohen nga vendi duke emigruar, përgjatë viteve të fundit.
Një tjetër statistike e cilësuar problematike për vendin nga ekspertët është numri në ulje i lindjeve.
Censi i Popullsisë dhe Banesave u lajmërua fillimisht nga INSTAT se do të publikohej në 19 qershor, por më pas u shty pa dhënë një motiv. Mirëpo, kjo vonesë, për opozitën kishte qëllime të fshehura. Sipas tyre, e gjitha u bë për të fshehur rënien e popullsisë, madje nuk munguan as akuzat për falsifikim të të dhënave.
Censi i Popullsisë dhe Banesave 2023 është Censi i 12-të, që kur Shqipëria u shpall shtet i pavarur në vitin 1912. Censi i parë u krye në vitin 1923.
Lexo edhe:
Censi 2023/ Sa banorë janë vetëdeklaruar grekë, ja ndarja sipas besimit fetar
Censi 2023, 40% e hyrjeve në pallate janë bosh
Discussion about this post